Qazaqstanda bıologıa páninen halyqaralyq IBO-2024 olımpıadasyna daıyndyq júrip jatyr.
Olımpıadaǵa álemniń 81 elinen 300-den astam oqýshy jáne 500-den astam ǵylymı jetekshi men qonaqtar keledi dep kútilýde, dep habarlaıdy Almaty-akshamy.kz Oqý-aǵartý mınıstrliginiń baspasóz qyzmeti.
IBO-2024 bıylǵy jyldyń 7-14 shildesi aralyǵynda Nazarbaev ýnıversıteti bazasynda teorıalyq jáne 4 praktıkalyq týr (bıohımıa, molekýlalyq bıologıa, bıoınformatıka, janýarlar anatomıasy jáne fızıologıasy) boıynsha ótkiziledi.
Qazaqstandyq jas ǵalymdar men ótken halyqaralyq olımpıadalardyń jeńimpazdarynan turatyn IBO-2024 ǵylymı komıteti praktıkalyq jáne teorıalyq týrlarǵa tapsyrmalar ázirlep, osy jyldyń naýryz aıynda stress-test júrgizdi.
«Bıologıadan halyqaralyq olımpıadany joǵary deńgeıde ótkizý maqsatynda Qzaqstan Respýblıkasy Úkimetiniń birlesken qaýlysy qabyldandy. Álemniń 81 elinen kelgen oqýshylar elordanyń mádenı oryndaryn aralaıdy jáne Qazaqstannyń injý-marjany – Býrabaıǵa barady. Sondaı-aq komanda jetekshileri kásibı tájirıbe almasýǵa, olımpıadany uıymdastyrý men ótkizýge arnalǵan semınarlar men konferensıalarǵa qatysa alady», - deıdi «Daryn» RǴPO dırektory Ǵajdembek Tursynov.
Anyqtama úshin: Bıologıa páninen halyqaralyq olımpıada (IBO) – álem elderiniń joǵary synyp oqýshylary arasyndaǵy eń aýqymdy jarys. Qazaqstandyq oqýshylar ǵylymı jarysqa 1996 jyldan beri qatysyp keledi. Osy ýaqyt ishinde olar 2 altyn, 20 kúmis, 54 qola medal jáne 14 Qurmet gramotasyn jeńip aldy, bul joǵary kórsetkish bolyp sanalady. Qazaqstannyń osyndaı bedeldi is-sharany ótkizý orny retinde tańdalýy da sondyqtan.