Almatyda Eýro-Azıa óńirlik haıýanattar men akvarıýmdar qaýymdastyǵynyń jyl saıyn ótetin dástúrli halyqaralyq konferensıasy ótip jatyr.
«Qazaqstan» qonaq úıinde Almaty haıýanattar baǵy uıymdastyrǵan sharaǵa álemniń 21 elinen (Germanıa, Qytaı, Malaızıa, Túrkıa, Shvesıa, Brazılıa, Ázirbaıjan, BAÁ, Ózbekstan, Belarýs, Reseı, Chehıa, Tájikstan, Qyrǵyzstan, Armenıa, Slovakıa, t.s.s) 160-tan astam delegat qatysýda.
Eýroazıalyq óńirlik haıýanattar men akvarıýmdar qaýymdastyǵynyń (EARAZA) Prezıdenti Svetlana Akýlovanyń aıtýynsha, konferensıada haıýanattardy kútip-baptaý, sırek kezdesetin, azaıyp bara jatqan túrlerin saqtaý jáne kóbeıtý, janýarlarǵa qolaıly jaǵdaı jasaý syndy taqyryptar talqylanady. Sonymen qatar qaýymdastyq qataryna jańa músheler qabyldanady.
– Almatydaı ásem qalada bas qosqanymyz úshin qýanyshtymyn. Sondyqtan, men eń aldymen bizge qoldaý bildirgen Almaty qalasy ákimdigine, Haıýanattar baǵynyń basshylyǵyna jáne is-sharany uıymdastyrýǵa úles qosqan barlyq áriptesterimizge alǵys aıtamyn. Qazirgi haıýanattar baǵynyń basty mindeti – planetamyzdyń bıoártúrliligin saqtaı otyryp, sırek kezdesetin janýarlardyń qataryn kóbeıtý, olardy qamqorlyqqa alý. Sondyqtan búgingi is sharada sizder álemniń túrli elderinen kelgen tájirıbeli mamandardyń jumystarymen tanysyp, myqty veterınarlardyń keńesin tyńdaısyzdar. Dıalog alańynda áriptestik baılanys ornata otyryp, kóptegen máselelerdi sheshýdiń joldaryn qarastyratyn bolamyz. Sondaı-aq, búgin biz 4 elde ashylǵan 7 túrli jańa haıýanattar baǵymen tanysamyz. EARAZA konferensıasy – zoologıalyq qaýymdastyq úshin qashanda aýqymdy shara bolyp qala bermek. Sondyqtan bul baǵyttaǵy jumystarǵa búkil álem mamandarynyń qyzyǵýshylyq tanytyp jatqany bizdi qýantady, – deıdi qaýymdastyq basshysy.
İs-shara barysynda EARAZA-nyń osy baǵyttaǵy problemalary men perspektıvalary talqylandy. Konferensıaǵa qatysýshylardyń árqaısysy óz elindegi janýarlar álemine qatysty máselelerge toqtala otyryp, ázirlegen baıandamalaryn oqydy. Qatary sırep bara jatqan jáne sırek kezdesetin haıýanattar men zardap shekken janýarlarǵa qandaı qamqorlyq kórsetip jatqandary jaıynda tájirıbelerimen bólisti.
Aıta keteıik, konferensıa 13-15 mamyr aralyǵynda ótedi. İs-sharanyń birinshi kúni konferensıaǵa kelgen qonaqtar resmı tirkeýden ótip, ózara áriptestik baılanys ornatýǵa arnaldy. Odan keıin sheteldik qonaqtar Almaty haıýanattar baǵyna saıahat jasady.
Búginde Almaty memlekettik zoologıalyq parkinde 3,5 myńnan astam janýarlardyń 400-ge jýyq túri bar ekspozısıa ornalasqan. Bul janýarlardyń barlyǵy alty ekspozısıa seksıasyna bólingen.
İs-sharany uıymdastyrýshylardyń aıtýynsha, konferensıanyń sońǵy kúni sheteldik qonaqtar «Altyn emel» ulttyq parkine, Sharyn shatqaly men «Aıǵaıqum nemese Ánshi qum» atty qumdy tóbege saıahat jasaýdy josparlap otyr.
Aleksandr LIPKOVICH, bıologıa ǵylymdarynyń doktory, Rostov haıýanattar baǵy ǵylymı-ádistemelik bóliminiń aǵa ǵylymı qyzmetkeri:
Almatynyń taýlaryn kórý – armanym...
Konferensıaǵa qatysyp jatqanyma óte qýanyshtymyn. Buǵan deıingi is-shara Rostov haıýanattar baǵynyń 95 jyldyǵyna oraı bizdiń elde ótken bolatyn. Eń bastysy mundaı basqosý mamandardyń óz tájirıbelerimen bólisýge múmkindik beredi. Sebebi, Haıýanattar baǵynda oryn alatyn jaǵdaılar osyndaı basqosýlarda sheshimin taýyp jatady. Búgingi is-shara osyndaı aqparattardy bólisýimen qundy.
Qazaqstannyń basqa qalalaryna barǵanmyn. Biraq, Almatyǵa alǵash kelýim. Qala týraly óte kóp jaqsy pikirler estımin. Sondyqtan eń birinshi qalanyń ózin aralap, tamashalaǵym keledi. Odan keıin taýlaryn kórý – meniń armanym... Aldaǵy kúnderi taýly aımaqqa saıahat jasaýǵa ýaqyt tabamyn dep oılaımyn.