Kıkiljińder, klımattyń ózgerýi, jappaı qymbatshylyq azyq-túlik qaýipsizdigine qaýip tóndirip tur
«Azyq-túlik daǵdarysy gýmanıtarlyq apatqa ákep soǵýy múmkin». BUU azyq-túlik baǵdarlamasynyń basshylyǵy jahan jurtyn daǵdaryspen kúreste kúsh biriktirýge shaqyrýda, dep habarlaıdy Almaty-akshamy.kz.
Uıymnyń málimetinshe, qazir álemde 900 mln astam adam ashtyqtyń zardabyn tartyp otyr. Bir tilim nanǵa zárý jandarǵa qol ushyn sozý úshin álemdik qaýymdastyq Brússelde «Kómek» kórmesin uıymdastyrdy.
Afrıkalyq 1,5 jasar Naomıdiń salmaǵy bar-joǵy alty keli. Ashtyqtyń kesirinen Somalı, Nıgerıa men Sýdanda qazir 5 jasqa deıingi 20 mln bala ólim aýzynda jatyr. Ashrafı jahan jurtynan kómek suraý úshin Brússeldegi kórmege arnaıy kelipti, dep jazdy qazaqstan.tv.
«Jazda sý bolmaı, aımaǵymyzda egin shyqpady. Soǵystyń kesirinen Ýkraınanyń bıdaıy bizge jetpeı jatyr. Ashtyqtan bıyl ólkemizde 250 myń adam qaıtys boldy»,- deıdi «Afrıkaǵa kómek» uıymynyń jetekshisi Ashrafı Benýdjı.
BUU málimetinshe, qazir álemniń 48 elinde 924 mln adam ashtyqtyń zardabyn tartyp otyr. Deni Afrıka, Ońtústik Azıa men Latyn Amerıkasynyń halqy. Brússeldegi kórmede donor memleketter kómekke muqtaj jandarǵa jiberetin azyq-túlik, dári-dármekterin sórege shyǵardy.
«Kıkiljińder, klımattyń ózgerýi, jappaı qymbatshylyq azyq-túlik qaýipsizdigine qaýip tóndirip tur. Halyqaralyq qaýymdastyq kúsh biriktirip, muqtaj elderge bar kómekti jiberýi tıis. Úmit AQSH pen Batys elderinde»,- deıdi Gýmanıtarlyq kómek qorynyń bas dırektory Aıdyn Dýrmýsh.
Bul daǵdarys Eýropa elderinde jemis-jıdek, kókónis, azyq-túlik qunynyń sharyqtaýyna ákep soqty. «Shyǵynǵa shash etekten battyq»-degen sharýalar qazir ózge túgili óz naryǵyn qajetti azyq-túlikpen qamtýǵa qaýqarsyz. Soǵys toqtamasa, álemde ashtyqtan qyrylatyndardyń, kedeılerdiń sany kóbeıedi. Halyqtyń narazylyǵy kúsheıetin bolsa, jahandyq beıbitshilikke qaýip tónedi,-deıdi sarapshylar.