Álemde áli de 733 mıllıon adam ashtyqtan zardap shegýde, olardyń kópshiligi Afrıka aımaǵynda turady, dep habarlaıdy aqshamnews.kz.
Bul týraly Berlınde ótken Welthungerhilfe qaıyrymdylyq uıymynyń «Ashtyq ındeksi» baıandamasynda aıtyldy, dep jazady DW.
Dúnıe júziniń 36 elinde durys tamaqtanbaý jaǵdaıy «aýyr» dep baǵalansa, alty elde «óte aýyr» dep baǵalandy. Azyq-túlik ónimderin óndirý men jetkizýge qarýly qaqtyǵystar, ásirese Sýdandaǵy azamattyq soǵys jáne jahandyq klımattyq ózgeristerdiń teris áserleri kedergi bolýda.
Esepke sáıkes, erlerge qaraǵanda áıelder ashtyqtan kóbirek zardap shegedi.
Welthungerhilfe prezıdenti Marlen Tıme (Marlehn Thieme) álemdik qaýymdastyqty ashtyq máselesin sheshýge jetkilikti kóńil bólmeıdi dep aıyptady. Qaıyrymdylyq uıymynyń málimetinshe, 2022 jyly álemde 800 mıllıonnan astam adam ashtyqtan zardap shekken.
2023 jyly Tıme damý men gýmanıtarlyq kómek úshin Germanıanyń federaldy búdjetiniń qysqartylýyn synǵa aldy.
Welthungerhilfe basshysy atap ótkendeı, Germanıanyń Ekonomıkalyq yntymaqtastyq jáne damý mınıstrligi ázirlegen Agenda 2030 baǵdarlamasy jáne BUU jarıalaǵan turaqty damýdyń 17 maqsaty uzaq merzimdi perspektıvada ashtyqty jeńýdiń jaqsy strategıasy, biraq ony júzege asyrý úshin «saıası erik pen yntymaqtastyq» qajet.
2022 jyly nemis qaıyrymdylyq qory dúnıe júzinde 603 joba aıasynda álemniń 37 elindegi 18,8 mıllıon adamǵa kómek kórsetkeni atap ótildi. Esepke sáıkes, Welthungerhilfe ıeliginde 341,2 mıllıon eýro bolǵan, onyń 97,6 mıllıon eýrosy qaıyrymdylyq úshin bólingen. Sonymen qatar, Germanıa úkimeti men Eýropalyq Odaq tarapynan granttar bólingen.