Aldaǵy kúnderi qandaı aýa raıy kútiledi?
Elimizdiń batysynda, soltústik-batysynda jáne ońtústiginde joǵary qysym alqabymen jaýyn-shashynsyz aýa raıy saqtalady. Respýblıkanyń ortalyǵynda, soltústiginde, shyǵysynda jáne ońtústik-shyǵysynda atmosferalyq frontaldy bólimderdiń yqpalymen jaýyn-shashyn, negizinen qar túrinde bolady. 16 naýryzda kúndiz Almaty oblysynyń ońtústigi men taýly aýdandarynda, 17-18 naýryzda táýlik boıy elimizdiń shyǵysynda, ońtústik-shyǵysynda qatty jaýyn-shashyn, kóktaıǵaq, jaıaý burqasyn, jeldiń kúsheıýi kútiledi.
Qazaqstan boıynsha tuman boljanady. Temperatýralyq fonǵa keletin bolsaq, aıtarlyqtaı ózgerister kútilmeıdi, tek elimizdiń ońtústik-shyǵysynda aýa temperatýrasy túnde 0-8 gradýs sýyq, kúndiz 0-7 gradýs jyly bolady.