Almaty ákimi Darhan Satybaldy jumys sapary aıasynda Alataý aýdanynyń Tomırıs shaǵynaýdanyna baryp, Djıgıtovka ózeniniń boıyndaǵy toǵandardyń gıdrotehnıkalyq qurylystaryn qaıta jańǵyrtýǵa arnalǵan jobalyq-smetalyq qujattamanyń (JSQ) daıyndaý barysymen tanysty.
Ekologıa jáne qorshaǵan orta basqarmasynyń basshysy Mıras Gaısınniń málimdeýinshe, joba aıasynda jumys istep turǵan bes bógetti qaıta jóndeý, bir jańa bógetti turǵyzý, toǵan túbin tazartý jáne jaǵalaýdy bekitý josparlanǵan. Sonymen qatar beınebaqylaý, jaryqtandyrý jáne avtomattandyrylǵan monıtorıń júıelerin ornatý kózdelip otyr. Jobalanǵan aýmaqtyń jalpy kólemi 122,49 gektar, sý aıdynynyń aýmaǵy 38,82 gektar, al toǵandardaǵy sýdyń eseptik kólemi 821 myń tekshe metr.
Shahar basshysy sý aıdyndaryn ekologıalyq turǵydan qalpyna keltirýge keshendi túrde qaraý qajettigin atap ótti. Onyń aıtýynsha, bul ınjenerlik nysandardy qalpyna keltirý ǵana emes, sonymen birge turǵyndar úshin ekologıalyq jáne turmystyq turǵydan jaıly, qaýipsiz keńistik qurýdy bildiredi.
Ákimniń aıtýynsha, mundaı nysandardy qoǵamdyq demalys aımaqtaryna aınaldyrýǵa úlken múmkindik bar. «Ár eldiń tájirıbesine qarasaq, sátti mysaldar kóp. Mundaı toǵandardy kórkeıtip, halyqtyń ıgiligine jaratýǵa ábden bolady. Bul Alataý aýdany úshin taǵy bir halyq baratyn orynǵa aınalady», – dedi Darhan Satybaldy.
Sapar qorytyndysy boıynsha qala ákimi JSQ 2025 jyldyń sońyna deıin memlekettik saraptamadan ótkize otyryp tolyq aıaqtaýdy tapsyrdy. Jobaǵa jaıaý júrginshiler ınfraqurylymyn damytý, jaryq jáne kógaldandyrýmen jabdyqtalǵan irgeles aýmaqty kóriktendirý, tazartý qurylystaryn salý, jaǵalaýdy bekitý, toǵandardyń sanıtarlyq jaǵdaıyn baqylaýdy kúsheıtý jáne lastanýǵa jol bermeý sharalary engizilýge tıis.
Jobaǵa Almaty qalasy Ekologıa jáne qorshaǵan ortany qorǵaý basqarmasy tapsyrys bergen. JSQ ázirleýmen «Qazgıprovodhoz ınstıtýty» JSHS aınalysady. Qujattama 2025 jyly jeltoqsanda aıaqtalady dep josparlanǵan, al jobany iske asyrý merzimi – 2026-2027 jyldar.