Jas sýretshiniń kartınalary otbasy qundylyqtaryn dáripteıdi
Jas ta bolsa ózindik qoltańbasy qalyptasyp úlgergen sýretshi Nurbolat Asqardyń kartınalary adamdy birden baýrap alady eken. Oǵan Ábilhan Qasteev atyndaǵy QR Memlekettik óner mýzeıinde ashylǵan ĞALAM dep aıdar taǵylǵan jeke kórmesine barǵanda kózimiz jetti. Nesimen baýrap alady? Sol týraly az-kem tarqataıyq.
ĞALAM
Ómir bolǵan soń keı-keıde janymyzdy muń basyp, kóńilimizge sátsizdikterdiń kóleńkesi túsip, jabyrqap qalatynymyz bar. Al ondaı sátterde óner degen qudirettiń de jan-dúnıeńizge shýaq sebetin kezderi bolady. Nurbolattyń ĞALAM-y sizdiń jan dúnıeńizdiń ishki qyldaryn názik qana shertip óteri sózsiz. Áldebir kúıge bólep, tipti qolmen ustaı almaıtyn shabyt syılaýy múmkin. Demek, ĞALAM jáı ǵana kórme emes, ol – adamnyń ishki ǵalamy. Iá, jas sýretshiniń týyndylarynda kúndelikti ómirdiń jan tebirenterlik sulýlyǵy, kún saıyn kezdesetin jańa emosıalar men alýan túrli mezetter beınelengen. Bárinde de jumsaq jyly túster basym.
BOIAÝ
– Sýretshiniń elýge tarta týyndysynyń basyn biriktirgen kórmesi otbasy jáne ondaǵy jyly atmosfera, kúndelikti turmys-tirshiliktiń bir qalypty terbelisi, tynyshtyǵy, ásem tabıǵat syndy kóptegen taqyrypty qamtıdy. Avtor beıneli keskindeme men ımpressıonızmniń úılesimin sátti qoldanǵan. Ol kóbine qanyq kontrasttar men jyly reńkterdi baılanystyrý arqyly súıikti motıvterimen eksperıment jasap, tús qarqyndylyǵyn arttyrýǵa tyrysady. Jas sýretshi boıaýdyń baı tilin sheber meńgergen. Onyń keskindemesi tústerdiń merekesi desek te jarasady, onda árbir reńk bir-birimen baılanysyp, biregeı jáne úılesimdi kompozısıalardy quraıdy. Sýretshi kolorıtiniń baılyǵy onyń shyǵarmalaryn kóriktendirip qana qoımaıdy, sonymen qatar túrli sezimderdi, kóńil-kúıdi jetkizip, ár týyndyǵa erekshe qýat beredi, – deıdi ónertanýshy, kórme kýratory Samal Mamytova.
JYLÝ
Iá, sýretshi úshin otbasy degen – bul mahabbat, jeńis jáne adamdardyń rýhanı baılyǵy. Onyń «Oshaq», «Ana men bala», «Nemere», «Aq dastarhan», «Tórteý» «Áńgime», «Oıý», «Taltús» jáne basqa da jumystary otbasy qundylyqtaryn myń boıaýmen bederleıdi. Ondaǵy jumsaq túster jaılylyq pen jylýlyqty berip qana qoımaı, adamdardyń bir-birimen rýhanı baılanysyn, bir-birine degen yqylasyn ashyp kórsetedi.
Oshaq basyndaǵy qazany ottan túspeıtin ana, onyń aınalasynan shyqpaı, jylýlyqtan lázzat alyp júrgen oıyn balasy; sákide shyntaqtap jatqan meıirimdi áke, tizesine basyn qoıyp alańsyz jatqan uly; aqshamdaǵy qońyr kesh; tipti esikten túsken jap-jaryq sáýleniń ózi barlyq bereke osy bir ǵana otbasy taqyrybynyń aınalasynda ústemdik quryp turǵandaı.
KÓRME
Boıamasyz ómirden órilgen osyndaı shynaıy beınelerdi kenep betine bederlegen jas sýretshiniń ár kartınasynyń aıtary, óz tili bar. Qarapaıym sújetterge jan bitirgen sýretterdiń ózinen ómir men bolmysty, fılosofıalyq tolǵanystardy baıqaýǵa bolady. Onyń shyǵarmashylyq fılosofıasy kórermenin ásemdigimen ǵana tań qaldyryp qoımaı, beıne bir jeke saıahat pen refleksıaǵa shaqyratyndaı.
Aıtpaqshy, «Shabyt» halyqaralyq festıvaliniń gran-prı júldegeri, «Daryn» memlekettik jastar syılyǵynyń ıegeri Nurbolat Asqardyń buǵan deıingi kórmeleri Astanada, Ózbekstanda, Reseıde, Italıada, Úndistanda ótken. Kartınalaryn elimizdiń birqatar mýzeılerinen keziktirýge bolady. Tipti, Amerıka, Shveısarıada jeke koleksıalarda saqtaýly týyndylary da bar.
MAHABBAT
– Meni shańyraq shattyǵy, oshaq jylýy, kún sáýlesi, jylylyq, mahabbat, súıispenshilik, tatýlyq, bereke-birlik syndy qundylyqtar, qazaqy bolmysymyz, salt-dástúrimiz qyzyqtyrady. Kóbine janǵa jylýlyq beretin, kózge iline, túse bermeıtin fragmentterdi jazǵandy jaqsy kóremin. Ózim kórip júrgen shynaıy dúnıelerdi salamyn. Sondyqtan kórmeme kelgen jandar kartınalarymnan ózderin kóre alsa deımin. Shyǵarmashylyǵymda tústerge qatty mán beremin. Óıtkeni túster adamǵa jaqsy kóńil kúı syılaıdy dep bilemin, – deıdi Nurbolat Asqar.
Sýretshi Nurbolat Asqardyń qylqalamynan týyndaǵan álemi men ǵalamyna saıahat jasap, jańa emosıalarǵa bólený múmkindigin jiberip almańyzdar. Bul kórme barlyq ónersúıer qaýym úshin shabyt kózi bolary sózsiz. Kórmeni kórýge asyǵyńyzdar, atalmysh mýzeı tórinde 25 aqpanǵa deıin turady.