Alaıaqtardyń arbaýyna túsip, jalǵyz baspanasynan aıyrylyp qala jazdaǵan fılologıa ǵylymdarynyń doktory, profesor, ardager jýrnalıs Káken Qamzın jaqsy jańalyǵyn aıtty, - dep habarlaıdy Aqshamnews.kz tilshisi.
Jaǵdaı qalaı boldy?
Qazaq jýrnalısıkasynyń abyz ustazy, birneshe býyndy tárbıelegen Káken Qamzın bıyl shildeniń basynda alaıaqtardyń qurbanyna aınaldy. Aldymen ózderin "Energosbyt" qyzmetkerleri retinde tanystyrǵan alaıaqtar onyń mekenjaıy, JSN jáne páter týraly derekterin alyp, keıin Ulttyq qaýipsizdik komıtetiniń atyn jamylyp habarlasqan. "Úıińizdi tartyp alǵaly jatyr" degen syltaýmen shuǵyl satýǵa kóndirip, satylymnan túsken aqshany "Ulttyq banktiń arnaıy shotyna saqtaımyz" dep aldap, kýrer arqyly alyp ketken.
Polısıa ne deıdi?
Osy oqıǵadan keıin Almaty qalasy Áýezov aýdandyq polısıa departamentinde qylmystyq is qozǵaldy. Qoǵam belsendileri, jýrnalıser men saıasatkerler bul isti nazarǵa alyp, ardager ustazǵa kómektesý úshin úndeý jasady.
Ardager jýrnalısiń jańalyǵy
Káken Qamzın úıin qaıtaryp alý úshin 5 shildeden bastap elden "jylý" jınaýǵa májbúr boldy. Bul qadam onyń ózi úshin de, otbasy úshin de ońaı bolmaǵanyn aıtady.
"Ólimnen uıat kúshti. Biraq sizderdiń shynaıy janashyrlyqtaryńyz, qoldaýlaryńyz, jyly sózderińiz bizge úmit syılady", – dep jazdy ol.
Jınalǵan qarjy 9 529 836 teńgege jetkende, taǵy bir qýanyshty jaǵdaı boldy: bir qaıyrymdy azamat (aty-jónin atamaýdy suraǵan - esk.) jetpeı turǵan 23 mıllıon teńgeni qolma-qol ákelip bergen.
Káken Qamzın bul sátti júrek tolqynyspen sıpattady.
"Bul tek qarjylaı kómek emes, bul - senimniń, birliktiń, meıirimniń naǵyz kórinisi. Ol azamatqa Alla razy bolsyn!Otbasyna, ózine tek jaqsylyq tileımin! Rızashylyǵymdy bildiremin!” – dep rızashylyǵyn bildirdi.
Úıdi qaıta rásimdeý bastalady
Aldaǵy kúnderi ol satyp alýshy otbasyǵa tolyq aqshasyn qaıtaryp, úıin óz atyna qaıta rásimdeýge kirisetinin málimdedi. Sonymen qatar, kómek kórsetken, jyly sóz aıtqan, suhbat alǵan, duǵa jasaǵan barshaǵa shyn júrekten alǵys aıtty.