Almatyda Ulttyq ulannyń áskerı qyzmetshileri elimizdiń tanymal akterleri Murat Beısenbın jáne Marat Abdýllaevpen kezdesti. Bul mádenı is-sharaǵa megapolıske issaparmen kelgen QR Ulttyq ulany Bas qolbasshysynyń orynbasary, Halyq qaharmany general-maıor Qaırat Úmbetov te qatysty.
Áskerdiń oń beınesin qalyptastyryp, áskerı qyzmettiń abyroıyn arttyra túsýge, keıingi býyn jastardy Otandy súıý, qadirleý, ony qorǵaý úshin daıyn bolýǵa tárbıeleýde óner salasynyń da yqpaly zor ekeni sózsiz. Oǵan keıingi birneshe jyl qatarynan Ulttyq ulannyń qyzmeti men erjúrek batyrlaryna arnalǵan fılmderdiń túsirilýi, Ulttyq ulan án-bı ansambliniń elimizdiń ár oblysyna gastróldik saparmen shyǵýy, aqparttyq-nasıhat jumystarynyń belsendi júrgizilip turatyndyǵy, sarbazdarmen kezdesýge aqyn-jazýshylar, sporttaǵy chempıondar, ár saladaǵy óner adamdarynyń kelip turýy dálel bola alady.
Búgin de osyndaı jarqyn júzdesý bolyp, áskerı qyzmetshiler men óner adamdarynyń arasynda súbeli suhbat boldy. Kezdesýge kelgen Murat Bısenbın Qazaqstan ǵana emes, alys-jaqyn sheteldermen birlesip túsirilgen onnan astam kınokartınada oınaǵan. Onyń tanymaldylyǵy «Reketır» fılmine túsken soń, arta bastaǵan. Budan bólek, akter «Mahambettiń qylyshy», «Gúlstan», «Árkim Golgofqa shyǵa alady» hıkaıasynda jáne taǵy basqa kóptegen fılmde oınaǵan.
Al akter Marat Abdýllaev «Zahar Búrkit», «Taraz», «Qazaq handyǵy», «Baýyrjan Momyshuly» týyndylarynda sheber oıynymen tanylǵan. Ekrandaǵy er tulǵasymen kórermendi tánti etip júrgen akterlermen júzbe-júz kezdesý áskerı qyzmetshiler úshin erekshe jaǵdaı boldy.
QR Ulttyq ulany Bas qolbasshysynyń orynbasary general-maıor Qaırat Úmbetov óner adamdarynyń jastarǵa áskerı-patrıottyq tárbıe berý isine qosyp jatqan úlesterine alǵys bildirip, Murat Bısenbın men Marat Abdýllaevtiń keýdesine «Ulttyq ulan qyzmetiniń úzdigi» tósbelgisin taqty.