Keıingi jyldary óńir ákimderiniń áleýmettik jelidegi belsendiligi artyp keledi. Biri Instagram men TikTok arqyly halyqpen ashyq dıalog ornatyp jatsa, endi biri resmı paraqshalar arqyly atqarylǵan jumystaryn kórsetip jatyr. Alaıda mundaı ashyqtyq jurt kóńilinen shyǵyp ta, synǵa ushyrap ta qaldy. Aqshamnews.kz tilshisi áleýmettik jelide kózge túsip júrgen ákimderdi tizip shyqty.
Ǵabıt Syzdyqbekov – eń kóp oqyrmany bar ákim
Shymkent qalasynyń ákimi Ǵabıt Ábdimájıtuly Syzdyqbekovtiń Instagram paraqshasynda 100 myńǵa jýyq jazylýshysy bar. Ol paraqshasynda qaladaǵy is-sharalar, nysandardyń ashylýy, sheshilgen máseleler týraly vıdeolardy jıi jarıalap otyrady. Sondaı-aq, túrli paraqshada ákimniń qatysýymen túsirilgen vıdeolar keń tarap jatady
Alaıda bul belsendilik jurttyń bárine birdeı unaı bermeıdi. Belgili zańger Aıgúl Orynbek ony: "ákim emes, bloger bolý kerek edi" dep synady. Onyń pikirinshe, ákimniń jumysy shynaıylyqtan góri jasandylyqqa jaqynyraq kórinedi.
"Negizi Syzdyqbekovke eń myqty ákim emes, eń myqty bloger degen ataq berý kerek edi. Áleýmettik jelige kirip qalsam Shymkenttiń ákiminen basqa ákim jumys istemeı jatyr ma dep oılap qaldym. Vıdeo túsirip júrgender ákimderińe sál rólge kirýdi de úıretseńdershi, áıtpese, vıdeolaryń tym jasandy!", – dep jazdy zańger.
Aıta keteıik, Ǵabıt Ábdimajıtuly Syzdyqbekov 2023 jylǵy 5 qyrkúıekte Qazaqstan Respýblıkasynyń Prezıdentiniń Jarlyǵymen resmı túrde Shymkent qalasynyń ákimi qyzmetine taǵaıyndalǵan bolatyn.
TikTok-ta trendten túspeıtin Talǵar ákimi
Talǵar qalasynyń ákimi Arystan Ábilhaıyruly – TikTok jelisiniń belsendi qoldanýshysy. Onyń TikTok-ta 68,6 myń, Instagram-da 5 myń jazylýshysy bar. Ol jelide turǵyndar hattaryna ózi jaýap berip, shaǵymdarǵa qatysty sheshim qabyldaǵan sátterin jarıalaıdy. Sonymen qatar trendterden de qalyspaı, qaljyń aralas vıdeolar da túsiredi.
Jergilikti ákimniń osylaısha halyqpen beıresmı formatta baılanys ornatýy turǵyndar arasynda senim men tanymaldyq qalyptastyryp otyr. Olar ákimniń halyq jazǵan habarlamalarǵa birden jaýap berip, kezdesip, qaladaǵy máselelerdi nazarǵa alyp otyrǵanyna pikirler bóliminde jıi alǵysyn jaýdyryp otyrady.
Arystanbek Ábilqaıyruly qala ákimi bolyp 2024 jylǵy 15 jeltoqsanda saılanǵan.
Jańa ákimniń jańa kontenti
Jańa laýazymǵa saılanǵan Almaty qalasynyń ákimi Darhan Satybaldy Instagram-da 60 myńǵa jýyq oqyrman jınaǵan. Buryn Túrkistan oblysynyń ákimi, QR SİM júıesinde jáne prezıdent ákimshiliginde jumys istegen tájirıbeli memlekettik qyzmetker, 24 mamyrdan bastap Almaty qalasynyń ıgiligi úshin qyzmet etip jatyr.
Áleýmettik jelidegi paraqshasyn kóbine resmı sıpatta – jumys saparlary, ınfraqurylym, turǵyndarmen kezdesýler týraly posttarmen tolyqtyryp otyrady.
Aýdıtorıasy bar ákimder
Ákimder arasynda turaqty aýdıtorıasyn jınap úlgergenderi de bar. Máselen, Qostanaı oblysynyń ákimi Qumar Aqsaqalovtyń jazylýshylar sany – 33,5 myń. Ol da Instagram arqyly óńirdegi jobalar men kezdesýlerdi turaqty jarıalap otyrady. Al Almaty qalasy Almaly aýdanynyń ákimi Arman Shamshınniń paraqshasynda 22,8 myń jazylýshysy bar. Ol aýdandyq deńgeıdegi máselelerge belsene aralasyp, turǵyndarmen baılanys ornatý úshin Instagram-dy belsendi paıdalanyp júr.
Budan bólek ákimder arasynda jeke paraqshasyn júrgizbese de áleýmettik jelide jıi tóbe kórsetetin ákimder de bar. Mysaly, Mańǵystaý oblysynyń ákimi Nurdáýlet Qılybaıdyń jeke paraqshasy joq. Degenmen ol @mangystau_oblysynyn_akimdigi resmı paraqshasy arqyly jıi kórinip turady. Bul paraqshada ákimniń saparlary, óńirlik máseleler men sheshimder, memlekettik baǵdarlamalar týraly habarlar jarıalanady. Komandalyq júrgiziletin bul akkaýnt – resmı organnyń medıabeınesin qalyptastyryp otyr.