Aǵaly-inili boksshy Aıbek pen Nurbek Oralbaılar búginde qazaq sportynyń jarqyn juldyzdaryna aınaldy. Biri byltyr Olımpıada chempıony atansa, ekinshisi bıyl álem chempıonatyn baǵyndyrdy. Aǵaıydy sportshylar týraly ne belgili? Tolyǵyraq Aqshamnews.kz materıalynda.
Aıbek pen Nurbek Oralbaı 2000 jylǵy 11 tamyzda Jambyl oblysyndaǵy Aısha-bıbi aýylynda dúnıege kelgen. Shyqqan tegi – kóne tama rýy. Nurbek aǵasy Aıbekten bes mınýt keıin dúnıege kelgen.
Sport jolyndaǵy alǵashqy qadam
Ákesi balalaryn kúreske bergisi kelgen. Alaıda sport seksıasynda olarǵa boksqa barýdy usynǵan soń, aǵaıyndylar qolǵap kıip, rıngke shyqty. Toǵyz jasynda olar alǵashqy bapkeri Asqar Erkebaevpen tanysty. Erkebaev árdaıym egiz sportshymen jumys isteýdi armandap, olardy Olımpıada chempıondary etýdi maqsat tutqan. Birneshe jyl boıy bapkerdiń jetekshiligimen Astanadaǵy "Alataý" sport kesheninde shynyqqan egiz keıin Qajymuqan Munaıtpasov atyndaǵy sportqa daryndy balalarǵa arnalǵan respýblıkalyq mektep-ınternatyna qabyldandy.
Aıbek Oralbaı
Sportshy 90 keliden joǵarylarǵa arnalǵan katergorıada judyryqtasady.
Aıbektiń bıylǵy eń basty jeńisi – aty ańyzǵa aınalǵan kýbalyq La Krýsty utýy. Ol – eki dúrkin Olımpıada chempıony (2016, 2020) ári bes márte álem chempıony. Aıbek alǵashqy eki raýndty alyp, úshinshisinde nokdaýn eseptelgenimen, jeńisti bermedi.
Fınalda ózbek boksshysy Zokırovqa eki raýnd utylyp tursa da, úshinshi raýndta keremet kambek jasap, altyndy jeńip aldy.
olympic.kz
Nurbek Oralbaı
Sportshy – 2024 jylǵy Olımpıada oıyndarynyń kúmis júldegeri, 2023 jylǵy álem chempıony jáne 2022 jylǵy Azıa chempıonatynyń qola júldegeri. Ol 80 keli salmaqta óner kórsetedi.
gov.kz
Egizdiń ereksheligi
Aıbek pen Nurbek Oralbaı – Olımpıadaǵa qatysqan qazaq boksynyń alǵashqy egizi. Jalpy Olımpıada tarıhynda mundaı jaǵdaı alty ret qana kezdesken.
2021 jylǵy ÁCH-te Qazaqstan atynan birden eki egiz shyqty: Oralbaılar jáne Toltaevtar (Samatáli men Sanatáli).
2024 jylǵy Olımpıada aldynda reseılik Sports.ru portaly Oralbaılardy "qazaqstandyq Golovkınder" dep atap, Parıjde baqylaýǵa turarlyq boksshylar qataryna engizdi. Aıbekke Gennadıı Golovkınniń ózi de keńes bergen.
Aıbek – Nurbekten nebári 5 mınýtqa úlken. Otbasynda tórt ul, sonyń ishinde Aıbek – tuńǵyshy.
sportilinet.kz
Balalyq shaqtarynda Aıbek 58 kg, Nurbek 56 kg salmaqta judyryqtasqan. Bir ret Aıbek syrqattanyp qalǵan kezde onyń ornyna Nurbek shyqqan. Jigitterdiń aıtýynsha, muny tipti eshkim baıqamaǵan.
Egizdi áli de shatastyratyndar bar: mysaly, Parıj Olımpıadasynan keıin Aıbekti kópshilik Nurbek dep quttyqtap júrgen.
Boksqa kelý joly
Oralbaılar 8 jasynda Astanaǵa kóshken. Ákesi Rahat – erkin kúresten sport sheberi, bastapqyda egizin kúreske bergisi kelgen. Biraq "Alataý" sport kesheninde kúres seksıasy bolmaı shyǵady. Sonda jas bapker Asqar Erkebaev oǵan basqa usynys aıtqan.
"Aǵa, kúres joq, men bokstan jattyqtyramyn. Balalaryńyz egiz ǵoı, ýaqytsha maǵan berińiz. Tegin jattyqtyramyn. Armanym – egizdi álem chempıonatyna shyǵarý", – degen ol.
Osylaısha, aǵaıyndy Oralbaılar boksqa keldi.
sportilinet.kz
Balalyq shaq
Jigitterdiń ákesi Rahat Oralbaı úsh jerde jumys istep, kúzetshi bolyp kúneltken. Anasy mektepte eden jýýshy bolyp eńbek etken. Aqsha tabý ońaı bolmady. Aıbek pen Nurbek qosymsha tabys taýyp, ata-anasyna salmaq túsirmeýge tyrysqan.
sportilinet.kz
"Biz eshqashan áke-sheshemizden artyq aqsha suramadyq. Kerisinshe, qalaı kómektessek dep oılaıtynbyz. Kóp sportshy qıyndyqty jeńe júrip, úlken jetistikke jetedi", – deıdi Aıbek.
Astanada óz úıi bolmaǵandyqtan, otbasy jıi páter aýystyryp júrgen. Keıin aǵaıyndylar Stepnogordaǵy sport-ınternatqa túsip, segiz jyl jataqhanada turǵan. Aptalap úıge barmaı, kúnine eki ret jattyqqan.
"Sol kezde ózimizge "bolashaqta ata-anamyzǵa jumys istetpeımiz" dep sert berdik", – deıdi aǵaıyndylar.
Erkebaevtyń armany oryndaldy: Nurbek – 2023 jylǵy ÁCH chempıony, Aıbek – 2025 jylǵy ÁCH jeńimpazy.
sportilinet.kz
Olımpıadadaǵy múmkindik
Aıbek jasóspirimder deńgeıinde jaqsy nátıje kórsetkenimen, eresekter arasyna kelgende alǵashynda aýyr beıimdeldi. Parıj Olımpıadasyna lısenzıalyq týrnırde alǵashqy bolyp joldama alǵanymen, Olımpıadada ekinshi aınalymda Ázerbaıjan atynan shyqqan kýbalyq Loren Alfonsodan jeńildi.
Erekshe syılyqtar
Olımpıadadan keıin Aıbektiń ózine de syılyqtar buıyrdy. Máselen, Dımash Qudaıbergenniń anasy oǵan eki jylqy, al Nurbekke ton syılaǵan.
Keıin aǵaıyndylarǵa munaıdan jasalǵan erekshe kartına, blogerlerden kólik pen aqsha, tipti Toyota Prado avtokólikteri tartý etilgen.
"Árıne, men ondaı syılyqtar berilmese eken dep aıtamyn. Adamdar bizdi bólmeýge tyrysady, óıtkeni biz - egizbiz. Rýslan Berdenov maǵan da, Nurbekke de Toyota Prado avtokóligin syıǵa tartty. Men birnárse utyp alsam, mindetti túrde Nurbekpen bólisemin, sebebi biz – bir otbasymyz", - dedi Aıbek.
Sportshylardyń jeke ómiri
Aıbek 2022 jyly, Azıa chempıonatynda jeńiske jetken soń shańyraq kóterdi. Sol jyly Nurbek te chempıon atanyp, Astana ákimi eki aǵaıyndyǵa úsh bólmeli páter syılady.
Aıbektiń jubaıy – burynǵy dzúdoshy Arýjan Joldas. Ol Qazaqstan jasóspirimder quramasynda júldeger bolǵan. Turmysqa shyqqannan keıin sporttyq mansabyn aıaqtaǵan.
"Biz 2016 jyly Iakýtıada "Azıa balalary" týrnırinde tanystyq. Keıin úılengen soń men odan sportty qoıýyn suradym. Endi ol – ulymnyń anasy. Ulymdy dzúdoǵa bergim keledi. Boks joly tym aýyr, al dzúdo qazir qarqyndy damyp jatyr", – deıdi Aıbek.
Keıingi aqparat boıynsha, Nurbek áli boıdaq. Parıj olımpıadasynan keıin jeli qoldanýshylar Nurbekke qyzyǵýshylyq tanytyp, tanysýǵa bekingen edi.