9 - mamyr Manas Batyrbaevtyń otbasy úshin tek tarıhı meıram ǵana emes, bir otbasynyń 35 jyl boıy úzbeı jalǵastyryp kele jatqan qasıetti dástúri. Jeńis kúni olar ár jyly Máńgilik alaýǵa baryp, soǵys jáne eńbek ardageri, ulaǵatty ustaz Rahmanberdi Batyrbaevty eske alady. 35 jyldan beri úzilmegen osy taǵzym dástúri bıyl Jeńistiń 80 jyldyǵynda da jalǵasyn tapty. 15 mamyr – Otbasy kúni qarsańynda Aqshamnews.kz tilshisi urpaqqa ónege bolar myzǵymas dástúr týraly Manas Batyrbaevtyń ózinen surap bildi.
"Áke tiri turǵanda asqar taý alasarmaıdy eken"
Manas Rahmanberdiuly 1989 jyldan bastap ár Jeńis kúninde bir mınýt únsizdik jasap, otbasymen ákesiniń rýhyna taǵzym etedi. Bastapqyda bul rásim shaǵyn ǵana eske alý sáti edi, al búginde – birneshe urpaq jalǵaıtyn úlken ári jaýapty dástúrge aınalǵan.
Áke – ustaz, ardager, adamdyqtyń úlgisi
Manastyń Rahmanberdiulynyń ákesi – Rahmanberdi Batyrbaıuly Batyrbaev 1912 jyly Jambyl oblysy, Talas aýdany, Oıyq aýylynda dúnıege kelgen. 17 jasynan ustazdyq qyzmetin bastap, ómir boıy balalar tárbıesine arnaǵan jan. El ishinde bilimdi nasıhattaýǵa belsene aralasyp, “Qyzyl otaý” uıymyn basqaryp, alǵashqy pıoner úıin ashqan. Soǵys jyldary maıdanǵa attanyp, Otan aldyndaǵy boryshyn ótep qaıtqan. Bir qolyna bor, bir qolyna qarý ustaǵan bul azamat “Qyzyl juldyz”, “Qurmet belgisi” ordenderimen, túrli medaldarmen marapattalǵan. Soǵystan İİ top múgedegi bolyp oralsa da, 47 jyl boıy ustazdyq qyzmetin toqtatpaǵan.
“Bizdiń úıdiń júregi – ákem edi”
11 balanyń 9-ynshysy bolǵan Manas aǵa ákesin erekshe meıirimdi, parasatty jan retinde sıpattaıdy.
"Ákem eshqashan daýys kótermeıtin. Jaqsy men jamandy baıyppen túsindiretin. Bizge birde-bir ret qol kótermegen, tipti qatty sóz de aıtpaǵan. Kóp shákirti keıin elge tanymal laýazymdy azamattarǵa aınaldy. Olar ákemdi jıyndarda eske alyp, alǵys bildirip jatady", – deıdi ol.
Marqum anasy Qyzbala Qumarbekova – "Batyr ana" atanǵan jan. 1922 jyly dúnıege kelip, 2003 jyly ómirden ozǵan. Búginde Rahmanberdi Batyrbaıuly men Qyzbala Qumarbekovanyń 47 nemere, 37 shóberesi bar.
Máńgilik alaý janyndaǵy únsizdik
Manas aǵanyń aıtýynsha, ákesine taǵzym etý – jaı eske alý emes, bul – tárbıe, urpaqqa beriletin ónege, ákege degen saǵynysh.
“Men Alaýǵa toı toılaý úshin barmaımyn. Bul – meniń saǵynyshymnyń sáti. 9 mamyr – ákeme arnalǵan kún. Ol kisige degen qurmetimdi balalaryma sińirsem deımin. Biz bir mınýt únsiz turamyz. Syrt kózge qarapaıym rásim bolýy múmkin, biraq bizdiń otbasymyz úshin – qasıetti sát”, – deıdi ol tebirenispen.
Bári 1990 jyly bastalǵan. Áýelde tek óz otbasy jınalyp sýretke tússe, ýaqyt óte kele balalary men nemereleri qosylyp, ortasy keńeıip otyr. Tipti bul otbasynyń jyl saıynǵy dástúri sonshalyq ornyǵyp ketken, otbasy bul kúndi aldyn ala josparlaıdy.
“Bul kúni qudalarǵa da, kelinderge de aldyn ala aıtamyn: 9 mamyr – bizdiń otbasylyq kún. Qazir bári qyzyǵyp qatysady. Bir jyl burynǵy sýretterdi shyǵaryp, qalaı ózgergenimizdi salystyramyz”, – deıdi Manas Batyrbaev.
Medısına salasynda uzaq jyl qyzmet etken Manas Rahmanberdiuly – tájirıbeli dáriger-stomatolog. Qazir zeınette. 1982 jyly shańyraq kóterip, búginde eki qyz, bir ul tárbıelegen. Barlyǵy derlik otbasylyq dástúrge úles qosyp, atasynyń aldyndaǵy mindetin júrekpen atqaryp keledi.
“Ákem tiri turǵanda asqar taý edi – endi sony umyttyrmaý meniń mindetim”, – deıdi ol sóz sońynda.