Almaty kósheleri keıingi jyldary elektrsamokattarmen toldy. Keptelissiz qozǵalysqa yńǵaıly, arzan ári jyldam. Bir qaraǵanda Almaty úshin taptyrmas kólik kóringenimen, statısıkanyń sózinshe búginde qaýip pen zardaptyń negizgi sebepkerine aınalyp otyr. Aqshamnews.kz tilshisi zamanaýı qatynaý quralynyń keleshegin boljap kórdi.
"Bir kúnde kemi 2-3 adam samokattan zardap shegedi"
Balalar jedel járdem ortalyǵynyń qabyldaý bólimin basqaratyn Meıirjan Qurmanálıev elektrsamokattarǵa qatysty tańǵalarlyq derek usyndy. Onyń aıtýynsha, aýrýhanaǵa kún saıyn 2-3 bala samokattan alǵan jaraqatpen túsetinin aıtady.
"Jazda aıyna 60-90 bala, ıaǵnı bir maýsymda 300-ge jýyq bala jaraqat alady. 30 paıyzy aýrýhanaǵa jatqyzylady. Kóbine birneshe jaraqatpen bir-aq túsedi: bas-mı shaıqalýy, qol-aıaq synýy, syryp alý men kúıik shalý. Mundaı jaraqattar buryn balalarda jıi bolmaıtyn" dedi ol.
Dárigerdiń aıtýynsha, samokat soqqysynyń kúshi kóliktikimen shamalas:
"Samokattyń ózi 20-30 keli, ústindegi adammen birge 70-100 keli bolady. Sol salmaq 30-40 km/saǵ jyldamdyqpen 30 kelilik balany qaǵyp ótse, ol 4 metrge ushady. Bul - kólik soqqanmen birdeı" dedi dáriger.
Jol erejesi nege tek qaǵaz júzinde qaldy?
Kıksherıng kompanıalary (Jet, Iandeks, Woosh, Bolt) birneshe ret qaýipsizdik sharalaryn engizýge ýáde berdi. Birshama erejeler eskertilgenimen, qulaq asatyndar az. Naqty aıtar bolsaq:
- 18 jasqa tolmaǵan jasóspirimderge minýge;
- eki adam bolyp minip júrýge;
- trotýarda jyldamdyqty asyrýǵa bolmaıdy.
Kompanıa ereje buzýshylardy buǵattaý týraly aıtqan edi. Alaıda qazir-aq kóshege shyqsańyz, qos-qostan minip kezip júrgendi, trotýarlarda qatty jyldamdyqpen bezip júrgendi de baıqaýǵa bolady.
Al polısıa dereginshe, jyl basynan beri Qazaqstanda elektrsamokattyń qatysýymen 360-tan astam jol apaty tirkelip, 224 adam jaralanǵan. Sonyń 95%-y Almatyda bolǵan. Samokat júrgizýshileri 20 myńnan astam ereje buzǵan, onyń 7,4 myńy Almatyda.
Depýtat: "samokattardy jalǵa berýdi toqtatý kerek"
Almaty máslıhatynyń depýtaty Beıbit Qusaıynov bul máseleni túbegeıli sheshýdi usynady:
"Tártip ornamaıynsha, samokattardy jalǵa berýdi toqtatý kerek. Birinshiden — trotýarda júrýdi birjola toqtatý, tek velojolmen júrý. Biraq bizde velojol jetispeıdi, sondyqtan aldymen sony sheshý kerek" dedi ol.
"Samokattarǵa tıispeıik!"
Al ýrbanıst Vladıslav Fılatov samokattarǵa tyıym salý emes, olar úshin ınfraqurylym qurý qajet ekenin aıtady:
"Bir avtoturaqtyń ornyna 9–11 samokat syıady. Bul - adamdardy kólikke otyrmaýǵa yntalandyratyn qural. Olardy joıý emes, keń velojoldar, jabdyqtalǵan ótkelder men turaqtar salý kerek" deıdi.
Ol jýyrda Toraıǵyrov kóshesin abattandyrý jobasyna qatysyp, arnaıy samokat turaqtary men rezervtik alańdar salýǵa atsalysqan.
"Apattar bolyp jatyr dep olardy túbegeıli joıýǵa bolmaıdy. Aldymen paıdasyn da eskerý kerek. Eger ınfraqurylym túzelse, másele bulaı ýshyqpas edi", - deıdi ýrbanıst.