Shymkent qalasy ákiminiń orynbasary Rýslan Berdenov ózine jasalǵan qastandyq pen odan keıingi sot prosesine qatysty alǵash ret málimdeme jasady,- dep habarlaıdy Aqshamnews.kz tilshisi.
Onyń aıtýynsha, qazir ol bes oq jaraqatynan keıin em alyp júr jáne osy sebepti sot otyrystaryna jeke qatysa almaı otyr. Degenmen ol sot prosesin jáne aqparattyq keńistiktegi jaǵdaıdy muqıat baqylap otyrǵanyn aıtty.
Berdenov sotta aıyptalýshy Jıenbaı tarapynan aıtylyp jatqan málimdemelerge únsiz qala almaıtynyn aıtty.
«Bul – shantaj ben qysym kórsetý áreketi. Keıingi ret men ony dál sol keshte, ózi ańshy myltyǵynan oq atqan sátte kórdim. Odan keıin bizde eshqandaı baılanys bolmady. Keıin ol óz ókilderi arqyly meniń qorǵaýshylarymmen baılanys ornatyp, «dostasýdy» usyndy. Eger keshirim berilse, shý kótermeımiz, al bas tartsaq, aqparattyq shabýyl jasaımyz dep ses kórsetti. Tipti aıyptalýshynyń ákesi ózin-ózi órteıdi degen málimdeme taratýǵa daıyn bolǵanyn jetkizdi. Muny men tikeleı qysym dep baǵalaımyn», – deıdi ákimniń orynbasary.
Ol qandaı da bir arandatýǵa jol bermegenin jáne bastapqy ustanymynyń ózgermegenin atap ótti. Onyń aıtýynsha, janjaldyń negizinde kásibı sebepter jatyr.
«Jaýapker kelisim aıasyndaǵy jumysyn adal atqarǵysy kelmedi, esep berýden jaltardy. Men tek ashyqtyqty jáne mindettemelerdiń oryndalýyn talap ettim», – dedi Berdenov.
Sonymen qatar, ol sot prosesine qatysy joq jeke máselelerdi qozǵap, qoǵam nazaryn basqa arnaǵa burýdy «jalǵan aqparat pen manıpýlásıa» dep atady.
«Men onyń jubaıyn da, otbasyn da tanymaımyn. Ol men úshin tek merdiger bolatyn. Budan da soraqysy – búginde bul jalǵan málimdemelerge qala ákimine qatysty tustardy da qosyp jatyr. Bul taǵy da istiń aqıqatqa emes, qysym kórsetý men bedelge nuqsan keltirýge baǵyttalǵan óreskel manıpýlásıa ekenin dáleldeıdi. Men mundaı málimdemelerdi úzildi-kesildi joqqa shyǵaramyn jáne olardy moıyndamaımyn», – dep naqtylady ol.
Rýslan Berdenov ákimdikke qala ákiminiń shaqyrýymen kelgenin, bul qyzmetti ashyq ári adal atqaryp júrgenin aıtty. Onyń aıtýynsha, el men ózgeristerge senetin jastardyń senimin aqtaý – onyń basty maqsaty.
«Men saılaýǵa baryp, elimdi jaqsartqym keldi. Bul – úlken jaýapkershilik. Maǵan qarsy aıtylǵan jala men japqan jalǵan aıyptar meni jolymnan taıdyrmaıdy. Men ádiletti sotqa senemin», – dep túıindedi ol.
Onyń aıtýynsha, qazir denesinde ańshy myltyǵynan qalǵan 60-tan astam qorǵasyn oq bar, bul medısınalyq qujattarmen rastalǵan. Sottaǵy únsizdigine baılanysty jasalyp jatqan túrli paıymdarǵa da jaýap berdi:
«Únsizdik – kelisim emes. Men ádilettiń saltanat qurýyn kútip otyrmyn», – dedi Berdenov.
Aıta keteıik, búgin Shymkentte qala ákiminiń orynbasary Rýslan Berdenovke qastandyq jasaý isi boıynsha basty sot otyrysy bastaldy. Sottalýshy Ernar Jıenbaıdyń aıtýynsha, áreketine qyzmettegi kıkiljiń emes, jeke qyzǵanysh sebep bolǵan.
6 tamyzda bastalǵan sot otyrysy sottalýshydan jaýap alýdan bastaldy. Jıenbaı bul istiń qyzmettik máselelerge qatysy joq ekenin, bári qyzǵanyshtan týǵanyn aıtty.
Buǵan deıin, 28 shildede Shymkenttiń mamandandyrylǵan qylmystyq ister jónindegi sotynda aldyn ala tyńdaý ótken bolatyn. Ol kezde de Rýslan Berdenov sotqa qatyspaǵan.
İsti prokýror Baýyrjan Qaramanov júrgizip jatyr. Onyń málimetinshe, 2025 jylǵy 21 sáýirde Ernar Jıenbaı qala qurylys basqarmasyndaǵy nysandardy baqylaý bóliminiń bastyǵynan "Turǵyn úı Shymkent" JSHS basshysy qyzmetinen ketý týraly Berdenovtiń nusqaýy baryn estigen.
Sot Ernar Jıenbaıdy QR QK 24-baby 3-bóligi jáne 99-baby 1-bóligi ("Adam óltirýge oqtalý") boıynsha aıyptap otyr. Keıbir derekterge qaraǵanda, ol buǵan deıin "Turǵyn úı Shymkent" JSHS mekemesin basqarǵan. Sot Jıenbaıdyń bet-júzin túsirýge qarsy ekenin eskerip, túsirilimge shekteý qoıdy.