Táýelsizdik jyldary dúnıe esigin ashyp, ósip-jetilgen jas býyn búginde er jetip, úlken ómirge, keıbiri el basqarý isine de aralasyp jatyr.
QR Aqparat jáne qoǵamdyq damý mınıstri Aıda Balaeva áleýmettik jelidegi paraqshasynda qazaqstandyqtardy Táýelsizdik merekesimen quttyqtady, dep habarlaıdy Almaty-akshamy.kz
«Barshańyzdy Táýelsizdik kúni merekesimen shyn júrekten quttyqtaımyn! Bıylǵy jyl halqymyz úshin el Táýelsizdiginiń 30 jyldyǵy aıasynda erekshe mańyzǵa ıe boldy. Osy beleske aman-esen jetý úshin elimiz talaı qıyndyqtar men daǵdarystardy bastan ótkerdi. Kópshilik qaýym azattyqtyń aq tańynyń qalaı atqanyna kýá boldy. Alǵashqy toqyraý jyldardyń san túrli synaǵynan ótti. Ókinishke oraı, táýelsizdiktiń alǵashqy qalyptasýyna aıanbaı ter tókken qanshama aldyńǵy býyn aǵa-apalarymyz búginge jetpeı ómirden ótip ketti. Dese de, urpaq aman bolsa, ómir jalǵasady.
Táýelsizdik jyldary dúnıe esigin ashyp, ósip-jetilgen jas býyn búginde er jetip, úlken ómirge, keıbiri el basqarý isine de aralasyp jatyr. Sondyqtan Táýelsizdiktiń 30 jyldyǵynyń jeńisi men jetistikteriniń túbinde barsha qazaqstandyqtardyń úlesi jatyr. Elimiz Táýelsizdiktiń tórtinshi onjyldyǵyna ishki jáne syrtqy saıasaty ornyqty, birligi myǵym, ekonomıkasy qalyptasqan memleket retinde attap otyr. Biz tutastyqtyń qadirin tolyq túsinetin ári bıik baǵalaı biletin qoǵam qalyptastyra aldyq.
El basyna kún týǵan pandemıa kezinde birtutas halqymyz muny laıyqty dáleldeı aldy. Biz eldegi tynyshtyq pen ishki turaqtylyqtyń qoǵamdaǵy árbir azamattyń sanaly áreketine baılanysty ekenin uǵyndyq. Aınalaǵa janashyr bolyp, jaqyndarymyzǵa kómek qolyn sozýdyń qanshalyqty mańyzdy ekenin bildik.
Olaı bolsa, Táýelsizdik merekesi barshańyzǵa jarqyn qýanysh syılasyn! Denderińizge saýlyq, otbasylaryńyzǵa amandyq, baq-bereke tileımin! Elimiz aman, zamanymyz tynysh, Táýelsizdigimiz máńgilik bolsyn!» – dep jazdy Aıda Balaeva.