Atom elektr stansıalary ekologıalyq turǵydan tartymdy bolýda, óıtkeni tipti paıdalanylǵan ıadrolyq otyn da ekonomıkalyq qyzyǵýshylyq týdyrady. Bul otyndy qaıta óńdep, keńinen qoldanylatyn reaktorlar úshin MOH (Mixed-Oxide) otyny retinde paıdalanýǵa bolady. Osy sebepti AES-tiń ekologıalyq tıimdiligi artyp keledi.
Alaıda mundaı aýqymdy jobany iske asyrmas buryn keıbir táýekelderdi eskerý qajet.
«Ekonomıkalyq, saıası jáne ekologıalyq táýekelder bar. Qazaqstandaǵy iri jobalar, mysaly, LRT sıaqty, sybaılas jemqorlyq táýekelderine ushyraıdy. Buǵan qosa, elimizde iri obektilerdi salý kezinde ekologıalyq táýekelder jetkilikti túrde qadaǵalanbaǵan. Reaktorlar sýdy salqyndatýdy qajet etedi, sondyqtan sý resýrstaryna baǵa berý, sýdyń temperatýrasy men bıoártúrlilikke áserin zertteý qajet», – deıdi Batys Qazaqstan ekologo-geografıalyq qoǵamynyń basshysy Darhan Sarıev.
Chernobyl AES apaty postkeńestik urpaqtyń sanasyna qatty áser etken oqıǵalardyń biri. Alaıda ekologtyń pikirinshe, mundaı tótenshe jaǵdaılarǵa tym birjaqty qaramaý kerek:
«Chernobyl oqıǵasyna qarasaq, jarylys adamdar úshin úlken problemaǵa aınaldy. Biraq tabıǵat úshin asa zıan tıgizgen joq. Kerisinshe, ol jerde qazir tabıǵat qaıta jandanyp, damyp jatyr. Bul mysal arqyly biz ekologıany tereńirek túsinýge múmkindik alamyz. Tabıǵatta óz tepe-teńdigi bar, al ekologıa – adamdarǵa beıimdelgen tabıǵat. Adam ómir súre almaıtyn ortada ekologıalyq problema bar dep sanaımyz, biraq tabıǵat ózi adam úshin ekstremaldy jaǵdaılarda da damyp kete alady. Sondyqtan ekologıany kóbinese antroposentrlik kózqaras retinde túsiný mańyzdy».