Prezıdent AES qurylysyna qatysty kelissózderde elimizdiń múddesin eskerý qajet ekenin aıtty, - dep habarlaıdy Aqshamnews.kz tilshisi.
Memleket basshysy taıaýda Qazaqstandaǵy alǵashqy atom elektr stansıasyn salý boıynsha jumystar bastalǵanyna nazar aýdardy. Jobany halyqaralyq konsorsıým júzege asyrady. Onyń jetekshisi – "Rosatom" kompanıasy.
"Tıisti agenttik, jalpy Úkimet osy kompanıamen kelissózder ótkizgen kezde árdaıym elimizdiń múddesin eskerýi qajet, kelisimderdiń barlyǵy ádiletti, teńgerimdi, tıimdi bolýy kerek. Tabıǵı baılyǵymyzdy, ıaǵnı ýrandy talan-tarajǵa salýǵa bolmaıdy. Búgin men muny ǵalymdardyń jáne búkil ǵylym qaýymdastyǵynyń aldynda ádeıi aıtyp otyrmyn. Bul – asa mańyzdy másele. Árıne, biz bir atom elektr stansıasymen shektelip qalmaımyz. Ekinshi, úshinshi atom stansıasyn qazirden bastap josparlaı berýimiz kerek. Qytaı tóraǵasymen kezdesýde biz osy máseleni talqyladyq. Elderimiz beıbit atom baǵytyndaǵy yqpaldastyǵyn kúsheıte beredi. Qytaıdyń ózinde aldaǵy on bes jylda 76 jańa reaktor iske qosylmaq. Shyǵystaǵy kórshimiz – osy saladaǵy jetekshi memlekettiń biri", – dedi Qasym-Jomart Toqaev.
Prezıdent qazir jer qoınaýyn ıgerýshiler óz tabysynyń bir paıyzyn ǵylymdy damytýǵa bólip jatqanyna mán berdi.
"Bul salyq emes, ony elimizdiń tehnologıalyq áleýetin arttyrýǵa úles qosý dep túsingen jón. Úkimet osy qarajattyń bir ortalyqtan únemdi, tıimdi ári ashyq jumsalýyn qamtamasyz etýge tıis. Atom salasyn zertteıtin ǵylymı qalashyqtar qurýǵa erekshe nazar aýdarý qajet. Almatydaǵy Iadrolyq fızıka ınstıtýtynyń bazasynda kóp maqsatty zertteý reaktoryn salý múmkindigin qarastyrǵan jón. Jalpy ınstıtýttyń áleýeti joǵary. Elimizdiń jańa ǵylymı qalashyǵyn osy mekemeniń negizinde qurýǵa bolady. Sonymen qatar, memlekettiń qarjylyq múmkindikterin eskerip, quny birneshe mıllıard turatyn jobalarǵa shashylmaǵan durys. Bul osyǵan uqsas basqa da jobalarǵa qatysty. Abaı oblysynda AES salý perspektıvasyn eskere otyryp, Kýrchatovtaǵy ǵylymı qalashyqtyń egjeı-tegjeıli josparyn ázirleý qajet. Bul jumysqa Ǵylym akademıasy, oblys ákimdigi jáne Ulttyq ıadrolyq ortalyq atsalysqany jón. Onda ınjenerlik jáne óndiristik nysandardy ornalastyrý úshin jaǵdaı jasaý kerek. Sonymen qatar, ıadrolyq ınfraqurylymdy nyǵaıtý úshin memleket-jekemenshik seriktestiginiń tıimdi tetikterin ázirleý mindeti tur", – dedi Prezıdent.