Sıfrlanǵan dáýir esimizdi ekranǵa elitip, paıymdaýymyzdy pernetaqtaǵa baılap tastaǵandaı. Aq qaǵazǵa qalammen jazý da kóbimiz úshin sırek sátke aınalyp barady. Biraq dál osyndaı dáýirde qazaqstandyq qyzdyń názik qoltańbasy sheteldik brendterdiń nazaryn jaýlap, ony halyqaralyq jobalarǵa deıin jetelegenin bilesiz be? Aqshamnews.kz tilshisi qalammen ǵalamdy tańǵaldyrǵan qyzylordalyq qyzdyń erekshe oqıǵasy jaıly tildesti.
Baq pen eńbektiń toǵysy
Arýjan Tólepova - Qyzylorda qalasynyń týmasy. Kásibı mamandyǵy boıynsha IT-menedjer. Degenmen, onyń ómir jolyn úshinshi kýrsta oqyp júrgeninde kezdeısoq kórgen bir beınerolık túbegeıli ózgertken. Ol jeliden kallıgrafıamen aınalysatyn qyzdyń paraqshasyn kórip, bul salaǵa qyzyǵýshylyq tanytady. "Men de jazyp kóreıinshi" degen nıetpen qolyna qalam alǵan arý, hobbıiniń qalaısha kásibine aınalǵanyn áńgimelep berdi.
"Mektepte oqyp júrgenimde de jazýym ádemi boldy. Muǵalimderim jıi maqtaıtyn. Negizi jazýy nashar adam da kallıgrafıany meńgerip ala alady. Al meniń bul salaǵa qyzyǵýshylyǵym hobbıime aınaldy. Men prosesten, ıaǵnı ózim jazǵan árbir jazbadan lázzat alatynmyn. Eshkim tapsyrys bermese de, ózime unaǵandyqtan kez kelgen nárse jaza beretinmin. Sol súıispenshilik, sol turaqtylyq bárin ózgertti", – deıdi Arýjan.
Alǵashqy tabys pen sheteldik usynys
Súıikti isin tapqan Arýjannyń eń alǵashqy kásibı tapsyrysy Fransıadan keldi.
"Jelige kallıgrafıalyq jumystarymdy jarıalap turatynmyn. Birde Fransýz úıinen habarlasyp, ashyqhattardy jazýǵa shaqyrdy. Ol habarlamany oqyǵanda sener-senbesimdi bilmedim. Bul meniń ómirimdegi jańa kezeńniń bastaýy boldy", – deıdi ol.
Sodan beri onyń Instagram-paraqshasy kásibı portfolıoǵa aınaldy. Álemdik brendter nazar aýdaryp, birinen soń biri baılanysqa shyǵa bastaıdy.
"Qate bolyp qaldy, basqa paraq bershi" dep aıta almaısyń"
Qazir Arýjan Chanel, MaxMara jáne BMW sekildi onnan astam sheteldik kompanıalarmen áriptestik ornatqan. Tipti Ulybrıtanıadaǵy mektep ony óz oqýshylarynyń oqýlyqtaryna izgi tilekter jazýǵa shaqyrdy.
"Maǵan berilgen tapsyrma kitaptardyń eń alǵashqy betine aǵylshynsha daıyn mátinderdi jazyp shyǵý boldy. Biraq qatty ýaıymdadym. Sebebi kitap betteri shekteýli. "Qate bolyp qaldy, basqasyn bershi" dep aıta almaısyń. Qobaljysam da, barynsha tyrystym. Keıin mektep basshylyǵy jumysyma dán rıza boldy", -dedi ol.
"Ádemi jazý kallıgrafıa emes"
Arýjan kallıgrafıa men ádemi jazýdyń aıyrmasyn naqtyraq túsindirdi:
"Kallıgrafıa jaı ádemi qoltańba qaldyrý emes. Ol – óz zańdylyǵy bar óner. Ár áriptiń kólbeýi, sımmetrıasy, yrǵaqtylyǵy eseppen jasalady. Munda shydamdylyq pen dáldik qajet. Bul sport sekildi: kún saıyn jattyǵý kerek", - dep qosty jas kallıgraf.
Ol kez kelgen adam bul ónerdi úırene alady deıdi: bastysy - qyzyǵýshylyq pen tabandylyq.
"Bir saǵatta 250 myń teńge tabýǵa bolady"
Arýjannyń aıtýynsha, Eýropa men Taıaý Shyǵysta, ásirese Dýbaı, London, Nú-Iork sıaqty qalalarda kallıgraftar luxury brendterdiń is-sharalarynda saǵatyna 100–300 dollar alady. Al premıým deńgeıdegi ıventterde bul soma 500 dollarǵa deıin barady. Iaǵnı bir ǵana saǵattyq jumys úshin shamamen 50–250 myń teńge tólenedi.
Odan bólek, shaqyrý bıletteri men ashyqhattarǵa jazylatyn mátin jol-jolymen esepteledi: shetelde bir joly 2–10 dollar, al konverttiń árqaısysy 3–8 dollar shamasynda baǵalanady. Arýjannyń oıynsha, Qazaqstanda bul naryq endi ǵana qalyptasyp keledi, biraq suranys jyl saıyn artyp jatyr.
"1–2 jyl ishinde bizde de osy deńgeıge jaqyndaıtyn praıstar paıda bolady dep senemin", – deıdi ol.
Qoltańbanyń qundylyǵy men keleshekke jospar
Arýjannyń aıtýynsha, kallıgrafıa búgingi qoǵamda erekshe mańyzǵa ıe:
"Qazir bári daıyn, bári sıfrlanǵan. Biraq sonyń saldarynan adamdardyń oılaý qabileti men este saqtaý qabileti álsirep barady. Kallıgrafıa mıdy belsendi jumys isteýge úıretedi, zeıindi arttyrady. Bári jasandy zamanda, qolmen jazylǵan, jasalǵan dúnıeniń quny da, máni de artyp keledi. Kompúterlik qaripter de bir kezderi sheberlerdiń qolynan týǵan. Biraq olardyń tiri qoltańbasy – múlde basqa dúnıe", – deıdi ol.
Arýjannyń endigi maqsaty aıqyn. Ol jeke kallıgrafıa stýdıasyn ashyp, shákirt tárbıeligisi keletinin aıtty.
"Meniń armanym – Qazaqstanda kallıgrafıa mektebin qalyptastyrý. Balalar men eresekterdi úıretip, osy ónerdiń qundylyǵyn kórsetý", – deıdi ol.
Sondaı-aq, halyqaralyq baıqaýlar men sheberlik sabaqtaryna qatysyp, tájirıbe almasýdy josparlap otyr.