Almaty qalasynda mereıtoı qarsańynda «Abay Plaza» atty jańa saýda ortalyǵy óz esigin aıqara ashty.
Jańa saýda kesheni Abaı dańǵyly men Altynsarın kóshesiniń qıylysynda, «Tıgrohaýd» kesheniniń janynda ornalasqan. Saýda ortalyǵynyń ashylýyna Áýezov aýdanynyń ákimdigi men Almaty qalasynyń kásipkerlik basqarmasynyń ókilderi jáne turǵyndar qatysty.
Ǵımaratta ártúrli tutyný taýarlary, sonyń ishinde eýropalyq óndirýshilerdiń kıimderi usynylǵan zamanaýı saýda oryndary ornalasqan. Sondaı-aq, kelýshilerge arnalǵan meıramhana kesheni, qoǵamdyq tamaqtaný oryndary men sulýlyq salondary jumys isteıdi.
«Tıgrohaýd» JSHS bas dırektory Azamat Shagıtovtyń aıtýynsha, «Abay Plaza» saýda ortalyǵynyń qurylysy 2024 jyldyń sáýir aıynda bastalyp, josparǵa sáıkes aıaqtalǵan. Qurylysty júzege asyrýǵa Almaty qalasynyń kásipkerlik basqarmasy men Áýezov aýdanynyń ákimdigi qoldaý kórsetken. Sonymen qatar, «Almaty Finance» tarapynan ınvestısıalyq qoldaý kórsetilgen. Qazirgi ýaqytta «Abay Plaza» kesheninde 50-den astam saýda núktesi jumys isteıdi.
Atalǵan nysan – tek zamanaýı arhıtektýralyq sheshim emes, ulttyq rýh pen tól mádenıettiń úılesim tapqan keńistigi. «Abay Plaza» – sán-saltanaty kelisken saýda, qoǵamdyq jáne zıatkerlik oryn, ári qazaq halqynyń mádenı kody men bolmysyn zamanaýı formatta usynatyn erekshe keńistik. Ǵımarattyń ishki jáne syrtqy kórinisi men bezendirýinde Abaı dáýiriniń boıaýy, qazaqy órnek, ulttyq naqysh keńinen qoldanylǵan. Kilem men keste elementteri, kıiz úı formasyndaǵy shaǵyn demalys aımaqtary kelýshige rýhanı áser syılap, ulttyń ótkeni men búginin baılanystyrady.
Ashylý rásiminen erekshe áser alǵan qonaq Sáýle Batyrbekova:
– Abaı – tek ótkenniń emes, búgin men bolashaqtyń da shamshyraǵy. Bul ortalyqtyń ashylýy – onyń murasyn ulyqtap, urpaq sanasyna jetkizý jolyndaǵy úlken qadamdardyń biri. Abaı Qunanbaıulynyń «Tolyq adam» tujyrymdamasy, adamgershilik pen bilimge negizdelgen ilimi – ortalyqtyń ıdeıalyq ózegine aınalmaq.
Bul – tek bir ǵımarat emes, ult sanasyna oı salar, jastarǵa baǵyt-baǵdar berer, rýhanıatty tirilter jańa keńistik bolaryna senemin», – dep atap ótti.
Uly Abaıdyń týǵan kúninde osyndaı ıgi istiń júzege asýy – eldiń rýhanı jańǵyrý jolyndaǵy naqty qadamy. «Abay plaza» – zıatkerlik keńistik pen mádenı qundylyqtar úılesim tapqan ortalyqqa aınalary sózsiz.