2024 jyldyń 4 mamyrynda elimizdiń jetekshi pedagogıkalyq joǵary oqý orny – Abaı ýnıversıtetinde Ashyq esik kúni ótti.
İs-sharaǵa Almatydan jáne elimizdiń basqa da óńirlerinen kelgen talapkerler men olardyń ata-analary qatysty, dep habarlaıdy almaty-akshamy.kz.
Sharanyń negizgi maqsaty – bolashaq stýdentterge ýnıversıtet atmosferasyna enýge, onyń bilim berý baǵdarlamalarymen, ınfraqurylymymen jáne stýdenttik ómirimen tanysýǵa múmkindik berý boldy. İs-sharaǵa qatysýshylar Qazaqstandaǵy pedagogıkalyq bilim berý flagmany týraly mańyzdy aqparat alyp, ýnıversıtettiń bilim berý salasyndaǵy qyzmetimen tanysty. Bakalavrıat, magıstratýra jáne doktorantýraǵa arnalǵan bilim berý baǵdarlamalary jáne ýnıversıtet stýdentteriniń kásibı qabiletterin shyńdaýdyń biregeı múmkindikteri usynyldy.
Ashyq esik kúni bolashaq stýdentterge ýnıversıtettiń akademıalyq jáne mansaptyq maqsattaryna qanshalyqty sáıkes keletinin túsinýge qolaıly jaǵdaı jasaldy. Álemdik standarttarǵa saı mamandar daıarlaýǵa baǵyttalǵan 180-nen astam bilim berý baǵdarlamalary, sonymen qatar qos dıplom jáne akademıalyq utqyrlyq baǵdarlamalary bilim berýdiń ár kezeńinde bilim alýshylardyń kásibı bilimin shyńdap, olardyń mansap jolyndaǵy qajetti daǵdylaryn damytýǵa yqpal etedi.
Abaı ýnıversıteti bilim berýdiń joǵary standarttarymen jáne oqytýdyń ozyq ádistemelerimen erekshelenedi, belsendi ǵylymı zertteýleri men ınovasıalyq tásilderi bar zıatkerlik ortalyq bolyp tabylady. Halyqaralyq standarttar men eńbek naryǵynyń talaptaryna jaýap beretin jańa formasıadaǵy pedagogıkalyq kadrlardy daıarlaıdy. Sonymen qatar, ýnıversıtet elimizdiń túkpir-túkpirinen kelgen muǵalimderdiń biliktiligin arttyrý jáne qaıta daıarlaý jumystaryn belsendi júrgizýde.
İs-shara sońynda qatysýshylar ýnıversıtet qyzmeti, mamandyq tańdaý tásilderi, sondaı-aq jumysqa ornalasý perspektıvalary týraly aqparattyq jumysty joǵary baǵalady. Ashyq esik kúni joǵary deńgeıde ótti. Ýnıversıtet ókilderi talapkerler men olardyń ata-analarynyń suraqtaryna egjeı-tegjeıli jaýap berip, stýdenttik ómir men bilim berý baǵdarlamalary týraly mańyzdy aqparattarmen bólisti.