Polısıa Abaı oblysynyń turǵyndaryn ormanda joǵalǵan er adamdy izdeýge kómektesýge shaqyrdy, - dep habarlaıdy Aqshamnews.kz tilshisi.
Polısıanyń málimetinshe, 25 shildede Ardaq Baıdúısen orman alqabyna ketkennen keıin oralmaǵan. Qazir ony izdeý jumystary barlyq aýmaqta júrgizilip jatyr. Oblys turǵyndarynan izdeý jumystaryna kómektesý suraldy.
Resmı derekterge sáıkes, 2025 jylǵy 27 shildede polısıaǵa joǵalǵan er adamnyń áıeli habarlasqan. Ol 1968 jyly týǵan Ardaq Baıdúısenniń joǵalǵanyn málimdegen.
"25 shildede ol Kishi Aqtóbe aýmaǵyndaǵy ormanǵa ketken, sodan beri onyń qaıda ekeni belgisiz. Qazir polısıa qyzmetkerleri jedel-izdestirý sharalaryn belsendi túrde júrgizip jatyr. Erteńnen bastap izdeýge Ulttyq ulan sarbazdary tartylady", – dep habarlady Abaı oblystyq polısıa departamentiniń baspasóz qyzmeti.
Orman alqabynyń aýmaǵy óte úlken bolǵandyqtan, Abaı oblysynyń turǵyndarynan joǵalǵan adamdy izdeýge atsalysý suralyp jatyr.
"Bizge sizderdiń kómekterińiz qajet. 31 shildede eriktiler jınalady. Jınalý orny – Kishi Aqtóbe aýmaǵy. Beıjaı qaramaıtyn barlyq azamatty izdeý jumystaryna qatysýǵa shaqyramyz", – dedi polısıa departamentiniń baspasóz qyzmeti.
Jınalý ýaqyty men naqty orny qosymsha habarlanatyn bolady.