Akademık indetten qutylýdyń jalǵyz joly vaksına saldyrý ekenin aıtty.
26 tamyz kúni tanymal qazaqstandyq tulǵa, medısına ǵylymdarynyń doktory, profesor Tóregeldi Sharmanov COVID-19-ǵa qarsy ekpe saldyrdy, dep habarlaıdy Almaty-akshamy.kz.
Akademık óziniń ekpe saldyrǵany týraly áleýmettik jelilerde kórsetti. Onyń pikirinshe, indetten qutylýdyń jalǵyz joly vaksına saldyrý bolyp tabylady.
«Búgin álemdi jaılaǵan bir ınfeksıa bar. Óte qaýipti indet. Ol – koronavırýs ınfeksıasy. Budan saqtanýdyń bir-aq joly bar, ol – betperde taǵý, vaksına saldyrý. Men 90-nan asyp bara jatyrmyn. Vaksına saldyrdym. Eshqandaı qaýip joq, uıqym jaqsy. Qaýipti indetten saq bolý úshin vaksına saldyryńyz. Vaksına saldyrý arqyly adam ózin jáne jaqyndarynyń ómirin saqtaıdy», – dedi Tóregeldi Sharmanov.
Sonymen qatar ǵalym qazaqstandyqtarǵa vaksına týraly jalǵan jańalyqtarǵa senbeý kerektigin eskertti.
«Qazir «vaksına qaýipti» degen jalǵan aqparat taratylyp jatyr. Senbeńiz, vaksına –bul qorǵanýdyń jalǵyz joly jáne jaqyn adamdaryńyzben birge bolýdyń jalǵyz múmkindigi», - dedi akademık.