Reseılik dáriger COVID-19-ben aýyrǵannan keıin búırekti tekserýge keńes beredi
Reseılik nefrolog dáriger koronavırýs saldary búırek qyzmetine zıanyn tıgizýi múmkin dep sanaıdy, dep habarlaıdy almaty-akshamy.kz.
Ol SARS-CoV-2 koronavırýsy APF2 fermenti bar barlyq organdarǵa shabýyldaıtynyn aıtty. Vırýs ony aǵzaǵa ený úshin reseptor retinde qoldanady.
Dárigerdiń sózinshe, bul reseptorlar júrekte, myqyn ishekte, óńeshte, qýyqta bolady. Búırekte olar eki ese kóp bolady, sol sebepti búırek vırýstyq ınvazıanyń asa joǵary qaýpine ushyraıdy. Vırýs aǵzaǵa engennen keıin jedel búırek jetkiliksizdigi ornaýy múmkin.
Búırektiń jedel zaqymdanýy COVID-19 ólimine ákeletin faktorlarynyń biri bolyp tabylady, ásirese, aýrýdyń aýyr aǵymynda. Sonymen qatar, nefrolog pasıentter oǵan deıin eshteńe baıqamaǵannan keıin, ózderiniń búıregi aýyryp júrgenin bilmeýi múmkin ekendigin aıtady, al koronavırýs buǵan deıin baıaý damyp kele jatqan prosesterdi kúrt ýshyqtyra alady.
Dáriger Anna Korobkına COVID-19-den úıde emdelip jatqan naýqastarǵa búırek qyzmetiniń jumysyn anyqtaý úshin ne isteý qajet ekenin tizip aıtyp berdi:
Ol úshin aqýyzdyń bar-joǵyn anyqtaý úshin jalpy zár analızin, kreatının mólsherin anyqtaý úshin bıohımıalyq qan taldamasyn jasatý kerek. Bul - búırektiń qanshalyqty jaqsy jumys isteıtinin tekserý úshin negizgi skrınıng. Keıinnen koronavırýstyń búırek tinine áserin boldyrmaý úshin qannyń uıý parametrlerin baqylaý jáne trombozdyń aldyn alý qajet, óıtkeni qan uıyǵyshtary búırek tamyrlarynda da paıda bolatyn kórinedi.
Bastysy, adam densaýlyǵy syr berse, aýrýdy asqyndyrmaı, dereý dáriger kómegine júgingen jón.