2025 jylǵy 8 mamyrda Almatyda «Taza Qazaqstan» baǵdarlamasy men «Almaty – ortaq úıimiz» naýqany aıasynda Uly Otan soǵysyndaǵy Jeńistiń 80 jyldyǵyna arnalǵan jalpyqalalyq ekologıalyq aksıa ótedi, dep habarlaıdy aqshamnews.kz
Aksıa qalanyń barlyq aýmaǵynda ótip, qoǵamdyq keńistikterdi, demalys aımaqtardy, saıabaqtardy, skverler men aýlalardy qamtıdy.
Qalany tazartýǵa qala turǵyndary, eriktiler, quqyq qorǵaý organdary, QR Qorǵanys mınıstrligine qarasty áskerı oqý oryndarynyń kýrsanttary, máslıhat depýtattary, qoǵam qaıratkerleri, sondaı-aq, estrada juldyzdary, sportshylar men blogerler jumylady. Olar Almaty kósheleri men skverlerdi kógaldandyryp, Uly Otan soǵysy batyrlarynyń rýhyna taǵzym etedi.
Aksıa aıasynda kósheler men saıabaqtardy sanıtarlyq tazalaý, baǵanalar men qorshaýlardy syrlaý, aryq jelisin tazartý, aǵash egý, shóp shabý, jasyl jelekterdi qalpyna keltirý, aǵashtar men butalardy sanıtarlyq maqsatta kesý, kógaldandyrylǵan aımaqtardy aǵymdaǵy jóndeý jumystary sıaqty túrli jumystar josparlanǵan.
Almaty qalasynyń ákimdigi aksıa qatysýshylaryna aǵash kósheti, qolǵap, qap, kúrek pen tyrma berý syndy barlyq qajetti kómek kórsetedi. Qatysýshylarǵa arnaıy fýtbolkalar, kepkalar jáne «Jeńis» estelik lentalary taratylady.
Senbilik 8 mamyr kúni tańǵy saǵat 9:00-de bastalady. Tómende qalanyń segiz aýdany boıynsha negizgi oryndary kórsetilgen:
Áýezov aýdany: 1-sh/a., Altynsarın dańǵyly (Jubanov kóshesinen Ulyqbek dańǵylyna deıin)
Alataý aýdany: Baǵanaly Orda kóshesindegi skver
Almaly aýdany: Amangeldi kóshesi (Tóle bı kóshesinen Qazybek bı kóshesine deıin)
Bostandyq aýdany: «Jas Qanat» skveri
Jetisý aýdany: Ratýshnyı saıabaǵy
Medeý aýdany: 28 gvardıashy-panfılovshylar saıabaǵy
Naýryzbaı aýdany: Aqsaı kóshesi, «Aqjar» skveri
Túrksib aýdany: Naberejnaıa kóshesi, 123-úı, Maıak jaǵynan
Aksıa merekelik, taqyryptyq atmosferada ótedi: konsertter, sheberlik dáristeri men ınteraktıvti alańdar uıymdastyrylady. Áskerı ánder men ardagerler erligine arnalǵan mýzykalyq qoıylymdar patrıottyq rýhty arttyryp, Uly Jeńistiń 80 jyldyǵyna arnalǵan senbiliktiń mańyzyn aıqyndaı túsedi.
Senbilikke bıznes ókilderi, PIK, MIB jáne olarǵa tıesili aýmaqtar úshin jaýapty uıymdar da qatysady. Kóriktendirý erejesine sáıkes, árbir menshik ıesi aýmaǵynda tártip ornatyp, qasbetterdi jóndep, tazalyqty qamtamasyz etýge mindetti. Kóriktendirý tólqujaty osy jaýapkershilikti bekitip, menshik ıesiniń áleýmettik rólin kúsheıtedi.
Qala turǵyndaryna yńǵaıly bolý úshin senbilik ótetin oryndarǵa «Baıqońyr» metro beketinen arnaıy avtobýs qatynaıdy: https://2gis.kz/almaty/geo/9430094738574967