Almaty ákimi Darhan Satybaldy Túrksib aýdanyna jumys saparymen baryp, turǵyndar úshin mańyzdy jobalarmen tanysty.
İs sapar Almaty telekomýnıkasıa jáne mashına jasaý koleji men jataqhananyń jańa ǵımaratynyń qurylys nysandaryn aralaýdan bastaldy. Oqý orny 1940 jyly qurylǵan. Eski ǵımarat paıdalanýǵa berilgen kezden beri jóndeý kórmegendikten, ony buzyp, jańa korpýs salý týraly sheshim qabyldandy. Jańa ǵımaratta zamanaýı jabdyqtarmen qamtamasyz etilgen oqý sheberhanalary, asqana jáne akt zaly bolady. Oryn sany 1050 stýdentke deıin artady dep josparlanýda.
Almaty ákimi qurylys qarqynyn arttyrýdy, árleý jáne abattandyrý jumystarynyń sapasyn qamtamasyz etýdi, sondaı-aq ǵımaratty zamanaýı ári sapaly jıhazben jabdyqtaýdy tapsyrdy. Qalanyń basshysy túlekterdi jumyspen qamtý máselesine erekshe kóńil bólip, kolej dırektoryna osy baǵyttaǵy jumysty kúsheıtýdi júktedi.
Sondaı-aq, Darhan Satybaldy «Almaty-1» temirjol vokzaly aldyndaǵy alańdaǵy skverdi jóndeý barysymen jáne Seıfýllın dańǵyly men Kýngýrskaıa kóshesi boıyndaǵy irgeles aýmaqtardy abattandyrý jobalarymen tanysty. Qorytyndy jumystardy osy jyldyń tamyzyna deıin aıaqtaý josparlanǵan.
Jumys sapary barysynda Almaty ákimine Osıpenko kóshesi boıyndaǵy 2,2 gektar jer teliminde dene shynyqtyrý-saýyqtyrý kesheniniń qurylysy jobasy tanystyryldy. Jer teliminiń bir bóligi jekemenshikte ornalasqan. Qazirgi tańda satyp alý rásimi júrgizilýde.
Kelesi nysan – №6 Oqýshylar úıi boldy. Bul jerde 1570 bala qosymsha bilim alady. 1958 jyly salynǵan bul ǵımarat kúrdeli jóndeý men seısmıkalyq nyǵaıtýdy qajet etedi. Darhan Satybaldy rekonstrýksıa jobasymen tanysty.
«Men jóndeýge qarsy emespin, qajet ekeni kórinip tur. Biz qoldaımyz. Eń bastysy – barlyq jumystardy baqylaýǵa alýyńyz kerek, sebebi bul ǵımarat sáýlet eskertkishi», – dep tapsyrma berdi ákim Oqýshylar úıiniń dırektoryna.
Qala basshysy tanysqan taǵy bir joba – Saýranbaev-Moldaǵalıev-Tolstoı-CHernyshevskıı kósheleri aralyǵyndaǵy tozyǵy jetken turǵyn úılerdi renovasıalaý. Almaty ákiminiń tapsyrmasy boıynsha, endi ınvestorlarmen kelisimsharttar jasalǵan kezde áleýmettik ınfraqurylymǵa túsetin júkteme esepke alynady.
Darhan Satybaldy Maıboroda kóshesinde júrginshiler aımaǵynyń qurylysy, Aqan Sery-Seıfýllın-SHolohov kósheleri aýdanyndaǵy ınjenerlik jelilerdi qaıta jańartý jáne №8 qalalyq klınıkalyq aýrýhanany rekonstrýksıalaý barysymen tanysty. Maıboroda kóshesi boıyndaǵy uzyndyǵy 1,1 km bolatyn jaıaý júrginshiler aımaǵy Seıfýllın dańǵylynan Baıqal kóshesine deıin sozylyp, jaıly ári qaýipsiz orta qurýdy kózdeıdi.
Aqan seri–Seıfýllın–Sholohov kósheleri aýdanynda sýmen jabdyqtaý jáne sý burý jelilerin rekonstrýksıalaý jáne salý kózdelip otyr. Jobaǵa sáıkes, 18,8 km sý qubyry jáne 27,9 km káriz jelileri salynyp, 1200 abonent qamtylmaq.
№8 Qalalyq klınıkalyq aýrýhanany rekonstrýksıalaý boıynsha alǵashqy kezeńde burynǵy balalar aýrýhanasy ǵımaratyna qabyldaý bólimshesin qosýdyń jobalyq-smetalyq qujattamasy ázirlenýde. Bul ǵımarat eresekterge arnalǵan aýrýhananyń quramyna enedi. Qurylys jumystary 2026 jyldyń basynda bastalady dep kútilýde.
Jumys saparynyń sońynda Darhan Satybaldy Baým toǵaıyn abattandyrý jáne Úlken Almaty arnasyna (ÚAA) kúrdeli jóndeý júrgizý jobalarymen tanysty. Sol jerde qala ákimi aýdan turǵyndarymen kezdesý ótkizdi.
Baým toǵaıy – Almatynyń eń úlken jasyl aımaqtarynyń biri. Ony abattandyrý jobasy aıasynda oryndyqtar men qoqys jáshikteri, jaryq shamdary, balalar jáne vorkaýt alańdary ornatylady, aǵashtar otyrǵyzylady.
ÚAA-ny kúrdeli jóndeý jobasy aıasynda úsh jaǵajaı aımaǵyn abattandyrý, jaıaý júrginshi jáne velosıped joldaryn salý kózdelgen. Sondaı-aq, gıdrotehnıkalyq qurylystardy ishinara aýystyra otyryp jóndeý, tireýish temirbeton qabyrǵalar, jaıaý júrginshi kópirleri men qorshaýlardy qalpyna keltirý jumystary júrgiziledi. Jóndeý jumystary aıaqtalǵannan keıin arnany sýmen toltyrý týraly kelisimge qol jetkizildi.
«Nazardy arnaǵa aýdaraıyq. Sý jiberemiz. Qajet bolsa, qosymsha abattandyrý júrgizemiz. 7-8 jyldan beri qurǵaq tur. Men Alataý aýdanynda boldym – ÚAA keı jerlerde qıraǵan, keı jerlerde topyraqpen tolyp qalǵan. Munyń bárin tazartý qajet», – dedi Almaty ákimi.
Qala basshysy men aýdan turǵyndary arasyndaǵy áńgime barysynda olar Baým toǵaıyn abattandyrý jáne qaýipsizdigin qamtamasyz etý máselelerin kóterdi. Atap aıtqanda, turǵyndar beınebaqylaý kameralaryn ornatyp, kóshe jaryǵyn qosý týraly ótinish bildirdi. Jaýapty qyzmet ókilderi toǵaı aýmaǵynda 100-den astam kamera ornatý, sondaı-aq jaryqtandyrý jelilerin tartý josparlanǵanyn habarlady.
Jumys saparynyń qorytyndysy boıynsha Darhan Satybaldy barlyq jobalardyń sapaly jáne ýaqytyly oryndalýyn qamtamasyz etýdi, sondaı-aq turǵyndarmen ashyq dıalogty jalǵastyrýdyń mańyzyn atap ótti.