Densaýlyq saqtaý mınıstrligi Premer-Mınıstrdiń tapsyrmasy boıynsha Mańǵystaý oblysyndaǵy mektep asqanalaryn jappaı tekserýdi aıaqtady.
66 mekteptiń as blogyn tekserý qorytyndysy boıynsha 65-nen sanıtarıalyq-epıdemıologıalyq talaptardyń kóptegen óreskel buzýshylyqtary anyqtaldy, 18 mln teńgeden astam somaǵa 57 aıyppul salyndy, 60 uıǵarym berildi, 62 qyzmetker jumystan shettetildi, 1 materıal sotqa berildi, dep habarlaıdy aqshamnews.kz DSM-ge silteme jasap.
Búgin óńirde Densaýlyq saqtaý mınıstri Aqmaral Álnazarova men oblys ákimi Nurdáýlet Qılybaıdyń qatysýymen mekteptegi tamaqtaný sapasy máseleleri boıynsha keńes ótti.
Buzýshylyqtardyń negizgi sebepteri - sanıtarıalyq-epıdemıologıalyq qorytyndylardyń bolmaýy, qujattalmaǵan nemese merzimi ótken ónim, sanıtarıalyq rejımdi saqtamaý, ystyq sýdyń bolmaýy, medısınalyq tekserýsiz jáne densaýlyqty kúndelikti baqylaýsyz qyzmetkerlerdiń jumysy, anyqtalǵan bakterıa tasymaldaýshylar (dızenterıa, stafılokokk), ydys-aıaq pen múkámmaldy tıisinshe óńdemeý-shaıyndylardyń 7,2%-nan ishek bakterıalary anyqtaldy.
«Tekserý qorytyndylary mekteptegi tamaqtanýdy uıymdastyrýdyń sapasy men jergilikti atqarýshy organdardyń tarapynan baqylaýdyń jetkiliksizdigi máselelerin týdyrady. 459 mektep oqýshysy zardap shekken Munaıly aýdanynda jappaı ýlanýmen ótken jylǵy tájirıbege qaramastan, buzýshylyqtar qaıtalanýda, bul mektep ákimshilikteri men bilim berý organdarynyń balalardyń qaýipsizdigi máselelerine formaldy qaraýyn bildiredi», - dep atap ótti búgin Sanıtarıalyq-epıdemıologıalyq baqylaý komıteti tóraǵasynyń orynbasary Roza Qojapova Mańǵystaý oblysynyń aktıvi aldyndaǵy keńeste sóılegen sózinde.
Sondaı-aq, tekserý barysynda mektep brakerajdyq komısıalary tarapynan álsiz baqylaý, qyzmetkerlerdi medısınalyq tekserýsiz jiberý, tamaqtaný nysandarynda bilikti personaldyń bolmaýy atap ótildi, bul toptyq ýlanýdyń qaıtalanǵan jaǵdaılaryna ákep soǵady.
Balalardyń sanıtarıalyq-epıdemıologıalyq salaýattylyǵyn qamtamasyz etý maqsatynda oblystyń Sanıtarıalyq-epıdemıologıalyq baqylaý departamentine profılaktıkalyq jumysty kúsheıtý, bilim berý jáne tamaqtaný nysandarynda aqparattyq-túsindirý jumystaryn júrgizý sapasyn jaqsartý jóninde tapsyrmalar berildi. Bilim basqarmasyna mekteptegi as bloktaryn sanıtarıalyq-epıdemıologıalyq talaptarǵa sáıkes keltirýdi qamtamasyz etý, júıeli negizde tamaqtandyrý qyzmetterin berýshini konkýrstyq qujattama talaptarynyń saqtalýyna tekserýdi qamtamasyz etý, Brakerajdyq komısıasynyń sapaly jumysyn qamtamasyz etý usynyldy.
Densaýlyq saqtaý basqarmasy - zańnama talaptaryna sáıkes jeke medısınalyq kitapshalardyń berilýine qatań baqylaýdy qamtamasyz etsin, olardy medısınalyq tekserýden tolyq ótpeı-aq berýge jol bermesin.
Buryn habarlanǵandaı, sanıtarıalyq-epıdemıologıalyq talaptardy buzýmen baılanysty problemalardy júıeli sheshý úshin QR Densaýlyq saqtaý mınıstrligi bilim berý nysandaryn memlekettik baqylaýdyń jańa tásilderin ázirledi.
Olar balalar bolatyn nysandarǵa erekshe mártebe berýge, obektıvti baǵalaý úshin tekserýler týraly aldyn ala habarlamany alyp tastaýǵa, sondaı-aq nysandardy sanıtarıalyq-epıdemıologıalyq talaptarǵa sáıkes keltirý maqsatynda monıtorıńtik saparlardy engizýge baǵyttalǵan.
Mańǵystaý oblysyna jumys sapary barysynda Densaýlyq saqtaý mınıstri «SQ-Farmasıa» JSHS biryńǵaı dıstrıbútorynyń oblystyq vaksına qoımasyna baryp, vaksınalardy saqtaý sharttaryn, «sýyqtyq tizbeginiń» saqtalýyn, tasymaldaý sharttaryn, jabdyqtardyń bolýyn tekserdi.
Qazirgi ýaqytta Mańǵystaý oblysynda epıdemıologıalyq jaǵdaı turaqty. 2024 jyldyń naýryz aıynan bastap 18 jasqa deıingi balalardy qyzylshaǵa, qyzamyqqa jáne epıdemıalyq parotıtke (QQP) qarsy ımmýndaý kórsetkishi 83,9%-dy qurady.