2022 jyldyń 5 qańtarynan bastap Covid-19 koronavırýs ınfeksıasynyń taralýynyń aldyn alý boıynsha qosymsha sharalar sheńberinde jekelegen obektilerdiń qyzmetine engiziletin jańa shekteýler kúshine enedi, dep habarlaıdy Almaty-akshamy.kz QazAqparatqa silteme jasap.
Qazaqstanda koronavırýstyń taralýyna jol bermeý jónindegi vedomstvoaralyq komısıa málimetinshe , elimizdiń bas memlekettik sanıtar dárigeriniń qaýlysymen jumys jáne demalys kúnderinde saýda jáne oıyn-saýyq ortalyqtaryna, saýda úılerine, saýda jelilerine (azyq-túlik emes), saýda jelilerine (saýda alańy 6000 sharshy metrden astam), karaokege kirýge jumys rejımi shektelmeı, qyzmetkerler men kelýshilerde qaýipsiz «jasyl» mártebe (vaksınalaý, synama alynǵan sátten bastap 7 kúnnen aspaıtyn teris nátıjesi bar PTR testi, turaqty medısınalyq qarsy kórsetilimderi bar, sońǵy 3 aı ishinde aýyryp saýyqqan adamdar) bolǵan jaǵdaıda ruqsat etiledi.
Qabyldanǵan sharalar koronavırýstyń "omıkron" túriniń taralý jáne juǵý jyldamdyǵyna negizdelgen, ol qazirdiń ózinde álemniń 110 elinn tabyldy, al 30 qarashada ol nebári 10 elden shyqqan bolatyn.
Omıkron shtamynyń taralýy birqatar elderdiń densaýlyq saqtaý júıesiniń shamadan tys júktelýin týdyryp otyr.
Osyǵan baılanysty qabyldanyp otyrǵan sharalar epıdemıologıalyq jaǵdaıdyń turaqtylyǵyn saqtaýǵa, aýrýlar sanynyń ósý qaýpin azaıtýǵa, neǵurlym qatań shekteý sharalaryn engizýge jol bermeýge baǵyttalǵan.
Koronavırýstyń bul túriniń juqpalylyǵy delta nusqasyna qaraǵanda 5 ese joǵary ekenin este saqtaý kerek, qaıta juqtyrý qaýpi joǵary.
Dúnıejúzilik densaýlyq saqtaý uıymynyń boljamy boıynsha aýrý birneshe aıdyń ishinde búkil álemge taralýy múmkin.