Elimizde «Otaý» baǵdarlamasy boıynsha 15 myń ótinim sátti qabyldandy.
Bul týraly Óńirlik komýnıkasıalar qyzmetinde ótken brıfıńte Almaty qalasy «Otbasy bank» AQ fılıalynyń dırektory Danagúl Túsipova habarlady.
2024 jyldyń 1 naýryzynan bastap Qazaqstanda «Otaý» jańa turǵyn úı baǵdarlamasy iske qosyldy. «Otaý» baǵdarlamasy jumys isteıtin jastardy, jas otbasylardy jáne «Otbasy banki» salymshylaryn baspanamen qamtamasyz etýge baǵyttalǵan. Ótinimder Baspana market (otbasybank.kz) portalynda onlaın qabyldanady, dep habarlaıdy Almaty-akshamy.kz.
«Qatysýshylar arasyndaǵy qarbalasty aldyn-alý úshin ótinimderdi qabyldaý merzimin barynsha qolaıly etti. Áleýetti qatysýshylarda eki aı ýaqyt bar, ıaǵnı 1 naýryzdan 30 sáýirge deıingi (qosa alǵanda) aralyqta. Bul rette osy kezeńdegi ótinim berý kúni men ýaqyty mańyzdy emes. Sondyqtan bank salymshylary óz depozıtterin tolyqtyryp úlgere alady, salymdaryn týystarynyń depozıtterimen biriktirip, baǵdarlamanyń sharttarymen muqıat tanysýǵa jáne sodan keıin ǵana ótinim berýge ýaqyttary bar», – deıdi Danagúl Túsipova.
Spıkerdiń aıtýynsha, 2024 jyldyń 3 sáýirindegi jaǵdaı boıynsha qabyldanǵan ótinimderdiń jalpy sany 20 662 jetti. Onyń ishinde 15 000-ǵa jýyq ótinim sátti qabyldandy, 5 976 ótinim baǵdarlama sharttaryna sáıkes kelmegendikten qabyldanbady.
Ótinimderdiń 67%-y 35 jasqa deıingi bank salymshylarynan qabyldanǵanyn atap ótýge bolady.
«Ótinimderdiń basym bóligi almatylyqtardan - 3 087 ótinim, Astana turǵyndarynan - 2 412 ótinim, Batys Qazaqstan oblysynyń turǵyndarynan - 1 304 ótinim, Aqtóbe oblysynyń turǵyndarynan - 1 196 ótinim, Shymkent qalasynyń turǵyndarynan - 940 ótinim qabyldandy. Al Jetisý - 213 ótinim, Túrkistan - 178 ótinim, Ulytaý oblystarynyń turǵyndarynan - 93 ótinim joldanǵan», - dep atap ótti D. Túsipova.
Ótinimderdi qabyldaý merzimi aıaqtalǵannan keıin tizimdi saralaý bastalady. Iaǵnı, qatysýshylardyń ótinimderi eń kóp jınalǵan upaılar sany boıynsha bólinedi:
- salym boıynsha syıaqy mólsheri boıynsha - árbir 1 000 teńge úshin 5 bal;
- salym merzimi úshin – depozıt qoldanylǵan árbir jyl úshin 5 bal;
- tirkelgen neke úshin - 10 bal;
- balalar úshin - olardyń sanyna qaramastan 50 bal.
Eger eki qatysýshynyń baldar sany birdeı bolsa, onda tizimge engizýdegi basymdyq salym somasy kóbirek jáne jınaqtaý merzimi uzaǵyraq adamdarǵa beriledi.
Saralaýdan keıin klıentter «Otaý» baǵdarlamasyna engenderdiń tizimin bank saıtynan kóre alady. Olarǵa kredıttik ótinim berý úshin shamamen 40 jumys kúni beriledi.
«Otbasy bank» osy ýaqytqa deıin qoldanystaǵy tutynýshylyq kredıtterdi ótep úlgerýge keńes beredi, sonda kredıtti maquldaý múmkindigi kóbirek bolady. Tólem qabilettiligin esepteý kezinde sońǵy 6 aıdaǵy resmı tabysy ǵana emes, sonymen qatar otbasyna jumsalatyn mindetti shyǵyndar, sondaı-aq naqty kredıtter boıynsha tólemder eskeriledi.
Eger baǵdarlamaǵa qatysýshy kredıt boıynsha oń maquldaý alsa, onda onyń baspana izdeý úshin 6 aı ýaqyty bolady.
Almatyda, Astanada, Shymkentte jáne oblys ortalyqtarynda tek bastapqy naryqtaǵy turǵyn úıdi, onyń ishinde QTK kepildigimen úlestik qatysý sharty boıynsha nemese saqtandyrý quralyn paıdalana otyryp satyp alýǵa bolady. Barlyq basqa eldi mekenderde kez kelgen turǵyn úıdi satyp alýǵa bolady.
Baǵdarlamaǵa qatysýshy bastapqy naryqtaǵy turǵyn úıdi otbasybank.kz portalynan ǵana satyp ala alady. Bul opsıa jańa turǵyn úı baǵdarlamasynyń bastalýy aıasynda turǵyn úı baǵasynyń jasandy ósýine jol bermeýge arnalǵan.
Osy platformada ornalastyrar aldynda árbir nysan turǵyn úıdiń aǵymdaǵy naryqtyq baǵasy negizinde qunyn kelisý prosesinen ótetin bolady. Eger ol naryqqa sáıkes kelse, onda qurylys salýshymen 1 sharshy metrge baǵany belgileı otyryp, osy turǵyn úıdi satý týraly kelisim jasalady.
«Aýdan ortalyqtarynda, monoqalalarda jáne aýyldarda satyp alýǵa bolatyn kez kelgen turǵyn úı alǵashqy naryqtan (eger ol eldi mekende bolsa) jáne qaıtalama naryqtan páter, sondaı-aq jeke úı satyp alýǵa bolady. Nysandar banktiń kepil saıasatyna sáıkes kelýi kerek. Iaǵnı turǵyn úı 1964 jyldan keıin jáne belgili bir materıaldardan salynýy kerek. Mysaly, bank qańqaly-qamysty qurylystardy kepil retinde qarastyrmaıdy», - dep túsindirdi spıker.
Almaty men Astanadaǵy maksımaldy kredıt somasy - 30 mln teńgege deıin, qalǵan óńirlerde - 18 mln teńgege deıingi sommany quraıdy.
«Otaý» baǵdarlamasy boıynsha bir kredıt aıasynda turǵyn úı satyp alý jáne jóndeý úshin aqsha alýǵa bolady. Biraq kredıttiń jalpy somasy ruqsat etilge eń joǵarǵy somadan aspaýy mańyzdy - Almaty, Astana qalalary úshin 30 mıllıon teńgege deıin jáne qalǵan óńirler úshin 18 mıllıon teńgege deıin.
Jóndeýge arnalǵan qaryz somasy kredıttiń jalpy kóleminiń 30%-ynan aspaýy tıis.
«Otaý» baǵdarlamasy boıynsha kredıt talaptary:
- bastapqy jarna - 20%-dan bastap;
- kredıt boıynsha mólsherleme - 9% (JTSM 9,2%-dan bastap);
- kredıt merzimi - 19 jylǵa deıin.
«Otaý» baǵdarlamasyna kelesi tulǵalar qatysa alady:
1. Otbasy bank salymshylary, onyń ishinde turǵyn úıge kezeginde turǵan azamattar da;
2. Otbasy bankte keminde 18 aı merzimindegi depozıti bar adamdar;
3. Jınaq shotynda ótinim berý sátinde keminde 1 mln teńge jınaq somasy bar adamdar;
4. Qatysýshynyń jasy - 18-den 63 jasty qosa alǵanǵa deıin;
5. Baǵdarlamaǵa qatysýshynyń jáne onyń otbasy músheleriniń sońǵy 5 jyl ishinde menshiginde jyljymaıtyn múlik (páter, úı, komersıalyq jyljymaıtyn múlik, kez kelgen nysanaly maqsattaǵy jer ýchaskesi) bolmaýy tıis;
6. Almaty men Astanada turǵyn úı satyp alý kezinde - osy qalalarda turaqty tirkeý bolýy tıis.
"Otaý" baǵdarlamasyn iske asyrýdyń barynsha ashyqtyǵy úshin onyń qatysýshylarynyń tizimi (kredıt alýshylardyń kelisimimen) Otbasy banktiń saıtynda jarıalanatyn bolady. Ár adamótinimderdi irikteý jáne baldardy esepteý nátıjelerimen otbasybank.kz portalynda tanysa alady.