Premer-mınıstrdiń orynbasary – jasandy ıntellekt jáne sıfrlyq damý mınıstri Jaslan Mádıev qazaqstandyqtar ınternetpen qashan tolyq qamtylatynyn málimdedi, dep habarlaıdy aqshamnews.kz
Onyń aıtýynsha, sońǵy úsh jylda telekomýnıkasıa salasyna 1 trıllıon teńgeden astam ınvestısıa baǵyttalǵan. Qazir 20 mıllıonnan astam mobıldi abonent jáne 3,7 mıllıon tirkelgen paıdalanýshy baılanys qyzmetterin qoldanyp júr. Internettiń ortasha jyldamdyǵy 94 Mbıt/s deńgeıine jetti.
«Osy jyly ınternet trafıgin tutyný aıtarlyqtaı artqanyn atap ótý qajet. Ol ótken jylmen salystyrǵanda eki ese kóp bolady dep kútilýde. Salany damytý 2024–2027 jyldarǵa arnalǵan «Qoljetimdi ınternet» ulttyq jobasy aıasynda iske asyp jatyr. 2027 jyldyń sońyna deıin halyqtyń 100%-y ınternetpen qamtylady. Internet jyldamdyǵy 100 Mbıt/s-tan asyp, optıkalyq baılanys jelileri aýyldyq eldi mekenderdiń 90%-yna deıin tartylady», - dedi Mádıev Úkimet otyrysynda.
Sonymen qatar mınıstr aýyldardy ınternetpen qamtý máselesine toqtaldy. Qazir Qazaqstanda 6 179 aýyldyq eldi meken bar. Olardyń 2606-sy magıstraldyq talshyqty-optıkalyq baılanys jelilerine (VOLS) qosylǵan. 663 aýylda jergilikti jeli bar.
«2026 jyldyń sońyna deıin taǵy 3 myńnan astam aýyldy magıstraldy talshyqty-optıkalyq baılanys jelisine qosý kózdelgen. Nátıjesinde 2027 jyldyń sońyna qaraı elimizdegi 4 786 aýylda optıkalyq jeli tikeleı úılerge deıin jetkiziledi. Osylaısha aýyldardyń 90%-dan astamy symdy tehnologıalar arqyly joǵary jyldamdyqty ınternetke qosylady. Osy jobalardy júzege asyrý úshin 2027 jyldyń sońyna deıin jalpy kólemi 323 mlrd teńgeni quraıtyn ınvestısıa qarastyrylǵan», - dedi vedomstvo basshysy.
Mádıevtiń aıtýynsha, aýyldardyń qalǵan 10 paıyzynda el halqynyń 1 paıyzdan az bóligi turady. Mundaı eldi mekender ınternetpen spýtnıktik tehnologıalar arqyly qamtamasyz etiledi.