Beeline Kazakhstan holdıńiniń prezıdenti Evgenıı Nastradınniń aıtýynsha, kelesi jyly tarıfter shamamen 20 paıyzǵa qymbattaıdy, dep habarlaıdy aqshamnews.kz
«Biz baǵalardy jylyna bir retten jıi kótermeımiz. Keler jyly bárimizdi qosylǵan qun salyǵynyń qymbattaýy kútip tur — bul salaǵa 35-40 mlrd teńge shamasynda áser etetin mańyzdy faktor. Biz baǵany qańtar aıynda ózgertýdi josparlap otyrmyz. Al bıyl klıentter úshin tarıfter óspeıdi. Kelesi jyly shamamen 15-20% shamasynda bolady», — dedi Nastradın Úkimette ótken baspasóz máslıhatynda.
«Mobaıl Telekom-Servıs» kompanıasy da jańa jyldan bastap tarıfterdi qymbattatýdy josparlap otyr.
«Tarıf qymbattaýynyń basty sebebi — halyq tarapynan ósip jatqan suranys pen oǵan ilese almaı jatqan ınfraqurylym. Operatorlar ınfraqurylymǵa kóbirek ınvestısıa salýǵa májbúr. Ózimizdiń búdjettik josparlaýymyz aıasynda ekonomıkalyq jáne salyq ózgeristerin, ınflásıalyq boljamdardy eskeremiz. Biz tarıf josparlaryn túzetý múmkindigin qarastyryp jatyrmyz. Shamamen 15-20% deńgeıinde bolady dep boljaýǵa bolady», — dedi «Mobaıl Telekom-Servıs» basqarma tóraǵasy Aleksandr Babıchev.
Al «Qazaqtelekom» AQ bas ákimshilik dırektory Erjan Meıramovtyń aıtýynsha, uıaly baılanys qyzmetterin kórsetý erejelerinde operatorlardyń shyǵyndary artqan jaǵdaıda tarıfterdi kóterýge bolatyn norma bar.
«Tarıf quramyna operatorlardyń birqatar shyǵyny kiredi, sonyń ishinde elektr energıasyna, jabdyq satyp alýǵa jumsalatyn shyǵyndar bar. Eger bul shyǵyndar ósse, ol tarıfterdiń ósýine áser etpeı qoımaıdy», — dedi Meıramov.