2026 jyl - Jylqy jyly. Nýmerolog Quralaı Baqyt Jibek Joly telearnasynyń "Bugin LIVE" baǵdarlamasynda bul jyl qoǵamǵa da, adam ómirine de tyń serpin ákelýi múmkin ekenin aıtty.
Mamannyń sózinshe, 2026 jyldyń sany - 1. Al "1" jańa bastamany, alǵa qadam basýdy, qozǵalysty bildiredi. Sondyqtan kelesi jyly adamdar táýekelge jıirek baryp, sheshimdi tez qabyldaýǵa beıim bolady. Nýmerolog 2026 jyldy shartty túrde ǵylym, sport jáne IT salalarynyń jyly deýge bolatynyn atap ótti: avtomattandyrý, jasandy ıntellekt, logıkaǵa negizdelgen baǵyttar qarqyn alyp damıdy.
Sonymen qatar, Quralaı Baqyt 2026 jyldyń stıhıasy ot ekenin aıtty. Bul - jyldamdyq pen iri ózgeristerdiń belgisi. Sol sebepti álemde de, Qazaqstanda da túrli úderister shıraq ári qarqyndy júrýi yqtımal. Eger 2025 jyly shyǵarmashylyq pen shoý-bıznes belsendi bolsa, 2026 jyly sport pen densaýlyq aldyńǵy orynǵa shyǵady.
Nýmerologtyń pikirinshe, kópshilik durys tamaqtanýǵa, sportqa, jalpy densaýlyqqa kóbirek mán bere bastaıdy - bul jyldyń basty plústarynyń biri.
Ol jyldyń ekinshi jartysy otbasy qurýǵa qolaıly ekenin, al alǵashqy aılarda asyǵys sheshim qabyldamaý keregin eskertti.
Boıdaqtar úshin 2026 jyl jeke ómirde jaǵymdy ózgerister ákelýi múmkin.
Aılar boıynsha boljamy da bar:
Qańtar–aqpan - medısınalyq tekserýden ótýge yńǵaıly;
Naýryz, sáýir, tamyz - úı alýǵa qolaıly kezeń;
Mamyr - bilim men oqýǵa ınvestısıa salýǵa jaqsy ýaqyt.
Týǵan jyldarynyń sońǵy sanyna qaraı nýmerolog mynadaı joramal usyndy:
6–7-men aıaqtalatyn jyldary týǵandar úshin mahabbat, otbasy jáne mansap úılesim tabady;
2–3-pen aıaqtalatyndar úshin tabys artyp, iri satyp alýlar jasaýǵa qolaıly;
0–1-men aıaqtalatyndar úshin rýhanı izdenis kúsheıip, densaýlyqqa kóbirek kóńil bólý qajet;
4–5-pen aıaqtalatyndar úshin qozǵalys, sapar kóbeıedi;
8–9-ben aıaqtalatyndar úshin jańa bastamalarǵa jol ashylady.
Quralaı Baqyttyń aıtýynsha, 2026 jyldyń túsi de ot stıhıasyna saı - qyzyl.