Baspana - ár otbasynyń basty qajettilikteriniń biri. Qazaqstanda ıpoteka baǵdarlamalary arqyly turǵyn úı alý – halyq úshin eń tanymal ári qoljetimdi sheshimderdiń biri.
Qazaqstanda ıpoteka bankter men memlekettik baǵdarlamalar arqyly beriledi. Turǵyn úı naryǵynda suranysqa ıe bolý úshin memlekettik qoldaý jáne tıimdi sharttar usynylady. Búgingi kúni elde tómen paıyzdyq mólsherleme, uzaq merzim, bastapqy jarnanyń ıkemdiligi sıaqty sharttarmen birneshe ıpotekalyq baǵdarlama bar, dep habarlaıdy aqshamnews.kz.
7-20-25
- Ereksheligi: Memlekettik turǵyn úı baǵdarlamasy.
- Paıyzdyq mólsherleme: 7%.
- Bastapqy jarna: 20%.
- Merzimi: 25 jylǵa deıin.
- Kimderge arnalǵan: Ortasha tabysy bar azamattarǵa.
- Artyqshylyqtary:
- Uzaq merzimde tólem jasaý múmkindigi.
- Tómen paıyzdyq mólsherleme.
- Jańa úılerdi satyp alýǵa baǵyttalǵan.
Eskerte ketetini, 1 qańtardan bastap bul baǵdarlamaǵa jańa talap engizildi. Úı alatyn adamnyń (ne bolmasa jubaıynyń) menshiginde sońǵy 18 aıda baspana bolmaýy kerek. Biraq bul sanatqa apatty jaǵdaıda turǵan, aýmaǵy 15 sharshy metrden aspaıtyn 1 bólmeli jataqhanalyq úı-jaılar kirmeıdi.
Qarjylyq saýat telegram-arnasynyń málimetinshe, osy baǵdarlamamen kredıt rásimdegen áskerı mamandarǵa da belgili bir deńgeıde jeńildik beriledi. Iaǵnı merzimdi áskerı qyzmette júrgen klıent negizgi qaryzy men paıyzdaryn óteý merzimin keıinge qaldyra alady. Ondaı múmkindik áskerı merzim aıaqtalǵan soń da 60 kúnge deıin saqtalady.
“NAÝRYZ”
- Syıaqy mólsherlemesi: Halyqtyń áleýmettik osal toptary úshin jyldyq 7% (JTSM 7,3%-dan 8,9% deıin), basqa sanattaǵy azamattar úshin 9% (JTSM 9,3%-dan 11,8% deıin).
- Alǵashqy jarna: 20%-dan 10%ǵa tómendetildi.
- Nesıe merzimi: 19 jylǵa deıin.
- Nesıe somasynyń shegi: Astana jáne Almaty qalalary úshin 36 mln teńgege deıin, basqa óńirler úshin 30 mln teńgege deıin.
- Qatysýshylar: Barlyq qazaqstandyq, onyń ishinde turǵyn úı kezeginde turǵan halyqtyń áleýmettik osal toptary, jumys isteıtin jastar, jas otbasylar, turǵyn úı tólemderin alýshylar, Otbasy bank salymshylary, monoqalalardyń, aýdan ortalyqtary men aýyldyq eldimekenderdiń turǵyndary.
Bıylǵy talap boıynsha endi satyp alynatyn baspana qonysqa daıyn bolýy shart.
Sondaı-aq “Naýryzben” baspana alatyndardyń shotynda 2 mln teńge bolýy kerek.
“UMAI”
Sharttary:
- Nesıe somasy: Eń joǵarysy 30 mln teńgege deıin.
- Paıyzdyq mólsherleme: Alǵashqyda jyldyq 14,4%, keıinnen 3,5%-5%-ǵa deıin tómendetiledi.
- Bastapqy jarna: 15%-20%.
- Nesıe merzimi: 25 jylǵa deıin.
- Turǵyn úı tańdaýy: Alǵashqy jáne ekinshi naryqtan, sonyń ishinde úlestik qatysý sharttary boıynsha satyp alýǵa bolady.
“JASYL IPOTEKA”
Sharttary:
- Zaem maqsaty - ÓMİR/ R MEMST/ BREAM/ LEED sáıkestik sertıfıkattary bar, qurylystyń «jasyl standartyna» sáıkes keletin nysannan jańa turǵyn úı satyp alý jáne jóndeý jumystaryn júrgizý;
- Bastapqy jarna – sharttyq somanyń 20%-nan 50%-na deıin;
- Zaem merzimi – 6 aıdan 25 jylǵa deıin;
- Qaryz somasynyń 50%-yn jınaqtaǵannan keıin zaem mólsherlemesin tómendetý -jyldyq 3,5 % (JTSM 3,6% bastap 4,4% deıin) bastap jyldyq 5 % (JTSM 5,1% bastap 6,9% deıin) deıin;
- Zaemnyń eń joǵarǵy somasy – 35 000 000 teńgege deıin.
Islam ıpotekasy
Otbasy bank seriktesterimen birge 2025 jyly Qazaqstanda ıslam ıpotekasyn iske qosýdy josparlap otyr.
Sharıǵat qaǵıdalaryna negizdelgen ıslam ıpotekasynda paıyzdar negizgi qaryzǵa qoldanyla almaıdy. Sondyqtan aldaǵy ýaqytta bank turǵyn úı qurylys jınaq júıesin paıdalana otyryp, ıslam qaǵıdattary boıynsha turǵyn úıdi qanshalyqty naqty satyp alýǵa bolatynyn qarastyrady.
Otbasy bank CSQlaw Qazaqstandaǵy fılıalymen de memorandýmǵa qol qoıdy. Bul malaızıalyq kompanıanyń Qazaqstandaǵy fılıaly. Yntymaqtastyq aıasynda bul kompanıa Otbasy bank qyzmetkerlerin sharıatqa saı qarjylyq quqyq negizderi men ıslamdyq qarjylandyrý boıynsha keshendi oqytýdy uıymdastyrady.
Arzan baǵaǵa qalaı baspana alýǵa bolady?
Jalpy, kóp adam bile bermeýi múmkin, naryqta oıyp turyp oryn alǵan qurylys kompanıalary óz klıentterine «seriktestik baǵdarlamamen» ıpoteka usynady.
Onyń jyldyq paıyzdyq stavkasy naryqtaǵy ekinshi deńgeıli bankterdiń ıpotekalyq stavkalarynan ájeptáýir tómen keledi. Qurylys kompanıalaryna úı izdep barǵanda mindetti túrde osy jaıynda surańyz, - dep jazady Qarjylyq saýat telegram-arnasy.
Fýndamenti endi bastalǵan úıden de arzan baǵaǵa páter alýǵa bolady. Biraq ol naryqta moıyndalǵan senimdi kompanıa bolǵany durys.
Sodan keıingi qadamyńyz bylaı: úı salýshy kompanıa menedjeriniń kómegimen turǵyn úı keshenin (JK) jáne páterdi “ornalasýyna” qarap otyryp tańdaısyz. Senińiz, qurylys kezinde úı áldeqaıda arzan bolady. Sosyn úı qunynyń 20%-yn jarna retinde tólep, óz páterińizdi “brondaý” arqyly baǵasyn “fıksasıalaısyz”. Fýndament kezindegi baǵany solaı ustap qalýǵa bolady. Sosyn qurylys kompanıasy usynatyn «seriktestik baǵdarlamamen» kelisimge otyrǵan bankterdiń prosenttik stavkasyna qarap otyryp, ıpotekalyq ónimderin qoldanasyz, - deıdi arna.
Bul partnerlik baǵdarlama klıentke eshqandaı shekteý qoımaıdy. Bank qaryz alýǵa bergen ótinimińizdi maquldasa, sol jetkilikti. Bul qyzmetterdiń bárin onlaın jasaýǵa bolady.
Joǵaryda keltirilgen ıpoteka baǵdarlamalarynan basqa da jobalar jeterlik. Mysaly, ǵalymdarǵa, jumysshy jastarǵa arnalǵan jaldamaly páterler, oǵan qosa jastarǵa arnalǵan óńirlik baǵdarlamalar bar.