Memleket basshysynyń 2025 jylǵy kóktemgi egis jáne kúzgi jıyn-terin jumystaryn erte qarjylandyrý jónindegi tapsyrmasyn iske asyrý aıasynda jeńildetilgen nesıeleýge ótinimder qabyldaý 2024 jylǵy 29 qarashadan bastaldy.
Bul aýyl sharýashylyǵy taýaryn óndirýshilerine egis naýqanyna der kezinde daıyndalyp, tuqym, tyńaıtqysh jáne aýyl sharýashylyǵy tehnıkasyn satyp alýǵa, sondaı-aq qajetti agrotehnıkalyq is-sharalardy júrgizýge múmkindik berdi, dep habarlaıdy aqshamnews.kz.
Kóktemgi egis jáne kúzgi jıyn-terin jumystaryn júrgizýge jalpy 700 mlrd teńgege deıin qarajat baǵyttaý kózdelip otyr. Onyń ishinde shamamen 560 mlrd teńge naryqtyq kapıtal kózderinen tartylýda.
Búgingi kúnge deıin 6 100 aýyl sharýashylyǵy óndirýshisi jalpy somasy 382,5 mlrd teńgege qarjylandyryldy. Jalpy 480,5 mlrd teńgege 7 myńǵa jýyq ótinimnen turatyn pýl qalyptasty. Úkimet qabyldaǵan sharalardyń nátıjesinde aýyl sharýashylyǵy taýaryn óndirýshileri qarjylyq resýrstarǵa barynsha jeńildetilgen ári qolaıly sharttarmen qol jetkizip otyr.
Baǵdarlamaǵa qatysýshylardyń aıasyn keńeıtý maqsatynda nesıe rásimdep, ony óteýge júginýge bolatyn qarjy ınstıtýttarynyń qatary ulǵaıtyldy.
«Agrarlyq nesıe korporasıasy» jyldyq 5% jeńildetilgen syıaqy mólsherlemesimen «Keń dala 2» baǵdarlamasy aıasynda qarjylandyrýdy jalǵastyrýda.
Qarjylandyrý prosesine Aqmola, Aqtóbe, Almaty, Batys Qazaqstan, Qostanaı, Qyzylorda, Pavlodar jáne Soltústik Qazaqstan oblystarynyń áleýmettik-kásipkerlik korporasıalary belsendi atsalysýda. Osy óńirlik qurylymdar arqyly aýyl sharýashylyǵy óndirýshilerin qoldaýǵa 165,3 mlrd teńge bólindi.
Qarjylandyrýǵa qoljetimdilikti arttyrý maqsatynda nesıe somasynyń 85%-yna deıin kepildik berý tetigi iske asyrylýda. 2025 jyldyń ózinde jalpy somasy 159 mlrd teńgeni quraıtyn nesıelerge 135,2 mlrd teńgege 943 kepildik berildi. Bul kepildikterdi «Damý» kásipkerlikti damytý qory usynady.
Sonymen qatar, aýyl sharýashylyǵy tehnıkasyn jyldyq 5% mólsherlememen jeńildetilgen lızıńke berý baǵdarlamasy jalǵasýda. Aǵymdaǵy jylǵa arnalǵan jalpy qarjylandyrý lımıti – 200 mlrd teńge. Bul aýyl sharýashylyǵy óndirýshilerine 6 000-nan astam otandyq tehnıkany satyp alýǵa múmkindik beredi.
Qazirgi tańda 120 mlrd teńgege 3 200 ótinim qabyldansa, 60,7 mlrd teńgege 3 435 tehnıka birligin satyp alýǵa 1 823 shart jasaldy.
Qolǵa alynǵan sharalar aýyl sharýashylyǵyn memlekettik qoldaýdyń mańyzdy quraly bolyp tabylady jáne elimizdiń agroónerkásiptik kesheniniń turaqtylyǵyn qamtamasyz etýge baǵyttalǵan.