Bıyl kınoálem jaǵymdy jańalyqtarǵa toly bolmaq. Jurttyń janaryn jaýlaǵan týyndylardyń taǵy bir bólimi taspalanyp, úlken ekranǵa jol tartpaq. Endeshe "fılmder jarylysy" atalǵan 2025 jyl qandaı kınofılmder men serıaldardyń jaryqqa shyǵatyn jyly bolmaq? Aqshamnews.kz tilshisi toptama jasady.
Avatar: Fire and Ash/Avatar: Ot jáne kúl
kınoda: 19 jeltoqsannan bastap
Rejıser Djeıms Kemeronnyń mega-sátti "Avatar" fılminiń franshızasynyń úshinshi bólimi "Ot jáne kúl" degen ataýmen ekrandarǵa shyǵady. Sem Ýortıngton, Zoı Saldana, Keıt Ýınslet, Stıven Leng, Klıff Kertıs jáne Sıgýrnı Ýıver fılmdegi rólderine qaıta oralady. Jańa keıipkerlerdi Ýona Chaplın, Devıd Túlıs jáne Mıshel Ie somdaıdy.
Zootopia 2/ Ańdar shahary 2
kınoda: 27 qarashadan bastap
2016 jyly jaryq kórgen bul múltfılmdi kórmegen jan joq shyǵar. "Ańdar shahary" múltfılmi erekshe sújetimen jáne ázil aralas qoǵam shyndyǵy sýrettelgen senarıimen kóptiń kóńilinen shyqqan bolatyn. Alǵashqy bólimi 1 mıllıard dollardan kóp kasa jınaǵan bul múltfılmniń endi ekinshi bólimi qarasha aıynda úlken ekranǵa jol tartpaq. Polıseı qoıan Djýdı men túlki Nık bul joly qandaı oqıǵaǵa tap bolar eken?
Wednesday/ Ýenzdeı (2 maýsym)
6 tamyzda jaryq kórdi
"Ýenzdeı" amerıkalyq telehıkaıasynyń ekinshi maýsymy birinshi maýsymnyń premerasynan keıin kóp uzamaı 2023 jyldyń 6 qańtarynda resmı túrde jarıalandy. Túsirilim 2024 jyly bastaldy. Alǵashqy tórt bólimi 2025 jyldyń 6 tamyzynda Netflix saıtynda shyǵaryldy. Endi jańa bólimderi qyrkúıektiń basynda taǵy shyǵady.
Wake Up Dead Man: A Knives Out Mystery/ Qynsyz qanjar: oıan, óli adam
kınoda: 19 jeltoqsannan bastap
Bul jazýshy jáne rejıser Raıan Djonsonnyń detektıv fılmi. Franshızanyń úshinshi bólimi 2025 jyldyń qazan aıynda festıváldarǵa qatysyp, jeltoqsanda úlken ekranǵa jol tartpaq. Buǵan deıin fılmniń eki bólimi kórermenniń kózaıymyna aınalǵan edi. 2019 jyly álemdik prokatta 312 mıllıon dollar jınady. Fılmniń búdjeti 40 mıllıon dollar boldy. Osylaısha, kartına shyǵyndaryn tolyq japty jáne paıda ákelgen edi.
QAITADAN/Apat týraly tuńǵysh qazaqstandyq fılm
kınoda: 4 qyrkúıekten bastap
Fılmniń sújeti Qyzylaǵash aýylyndaǵy 2010 jylǵy apatqa negizdelgen. Atap aıtqanda, álgi mezgilde aýyldaǵy sý qoımasyndaǵy bógettiń buzylýy nátıjesinde aýyl turǵyndary ómirge qaýipti jaǵdaıǵa tap bolǵan. Fılmde jasóspirim Raýan degen keıipkerdiń oqıǵasy baıandalady.
«Baqyt qushaǵynda» alǵashqy múzıkl-fılm
kınoda: 23 qazannan bastap
"Baqyt qushaǵynda" - Shámshi Qaldaıaqovtyń 95 jyldyǵyna arnalǵan mýzykalyq fılm-múzıkl. Rejıser ári prodúseri — Sanat Shapashov. Kartınada Dáýren Serǵazın, Azamat Satybaldy, Aıgúl Imanbaeva, Álıa Ánýarbek syndy akterler oınap, kompozıtordyń eń súıikti ánderi jańa tynyspen shyrqalady. Fılmniń ázirge resmı treıleri shyqqan joq.
Auru/Aýrý
kınoda: 13 qarashadan bastap
Qazaqstannyń eń jarqyn jas rejıserleriniń biri Aıtóre Joldasqalı taǵy bir erekshe týndysyn kórermenge usyndy. Túnekke uqsas atmosferada túsirilgen beınede er adam qyzdyń shashyn taqyrlap alyp, ekeýi jalǵan vıdeo túsirip, emge aqsha jınamaq bolady. "Qaryzdan qutylamyz da, boldy" degen fınaldyq sóz kórermendi moraldyq qaqtyǵysy tereń oqıǵa kútip turǵanyn ańǵartady. Basty rólde – qazaqstandyq tanymal akter Aıan Ótepbergen.