Jyl saıyn 20 mamyrda álemniń travmatolog-dárigerleri ózderiniń kásibı merekesin atap ótedi.
Elimizdiń travmatologtary kún saıyn myńdaǵan adamǵa shyn máninde aıaǵynan turyp ketýge kómektesedi. Ashyq súıek synýy, kúıikter, jol-kólik oqıǵalary, kúrdeli býyn operasıalary – mundaı árbir jaǵdaıdyń artynda kadr syrtynda qalyp jatatyn, biraq árdaıym sheshýshi ról atqaratyn dárigerler komandasy turady.
Búginde elimizde 1508 travmatolog, onyń ishinde 174-i aýyldyq jerlerde qyzmet etedi.
2024 jyly stasıonarlarda jaraqat alǵan 240 myńnan astam pasıent emdeldi, al aýrýhanaishilik ólim kórsetkishi 1,1%-ǵa deıin tómendedi, bul medısınalyq kómektiń sapasy artyp kele jatqanyn kórsetedi. Ótken jyly jalpy jaraqattaný kórsetkishi de 2023 jylmen salystyrǵanda 3,3%-ǵa tómendegeni baıqaldy.
2024 jyly jaraqatqa baılanysty jedel járdem shaqyrtýlarynyń jalpy sany 741 728-ge jetti, onyń ishinde jol-kólik oqıǵalaryna baılanysty shaqyrtýlar 4,6%-ǵa ósip, 47,8 myńdy qurady.
Jaraqat pen ýlaný jaǵdaılarymen em alǵandardyń qurylymynda negizgi úlesti qol-aıaq jaraqattary alady (35%), odan keıin – bas jáne moıyn jaraqattary (24%), al ýlaný men basqa da jaraqattardyń árqaısysy 10%-dy quraıdy.
Densaýlyq saqtaý júıesin jańǵyrtýǵa baǵyttalǵan memlekettik baǵdarlamanyń sheńberinde el boıynsha travmatologıalyq tósekterdiń sany 9,7%-ǵa arttyrylyp, arnaıy bólimsheler men kabınetterdiń jelisi keńeıtildi.
Travmatologıalyq jáne ortopedıalyq kómek kórsetý úshin kópbeıindi stasıonarlarda 160 travmatologıa-ortopedıa jáne kúıik bólimshesi jumys isteıdi, onyń ishinde 47-si balalarǵa arnalǵan, sondaı-aq, 80 travmatologıalyq pýnkt bar. Ambýlatorıalyq-emhanalyq uıymdarda 291 travmatologıalyq kabınet qyzmet kórsetedi.
Ońaltý qyzmetterdiń damýyna erekshe nazar aýdarylyp otyr: mundaı qyzmet kórsetetin oryndardyń sany 1218-den 2251-ge deıin ósti, bul múgedektik deńgeıin azaıtýǵa jáne pasıentterdiń ómir sapasyn jaqsartýǵa yqpal etedi.
Qazaqstannyń travmatologıalyq-ortopedıalyq qyzmetti damytýda eleýli jetistikterge qol jetkizgeni atap ótýge turarlyq. Sońǵy jyldary tirek-qımyl apparatynyń jaraqattary men aýrýlary bar pasıentterge kórsetiletin kómek júıesi barynsha qoljetimdi, tehnologıalyq jáne ońaltýǵa baǵyttalǵan boldy.
Densaýlyq saqtaý mınıstrligi vedomstvoaralyq ózara is-qımyl sheńberinde basqa memlekettik organdarmen jáne qoǵamdyq uıymdarmen birlesip, turmysta, óndiriste jáne kólikte qaýipsizdik standarttaryn saqtaý boıynsha profılaktıka jumystaryn júrgizýde, bul azamattardyń ómirin saqtap qalýǵa yqpal etedi.
Bastapqy medısınalyq uıymdar men jedel járdem stansıalarynda tótenshe jaǵdaılar men oqys oqıǵalardan zardap shekkenderge alǵashqy kómek kórsetý boıynsha oqytý júrgizilýde.
Densaýlyq saqtaý mınıstrligi travmatolog dárigerlerdi kásibı merekesimen quttyqtap, olardyń kásibıligi men halyq densaýlyǵyn saqtaý isine qosqan úlesi úshin shynaıy alǵysyn bildiredi.