Ulttyq kınony qoldaý memlekettik ortalyǵynyń qarjylandyrýmen ár jyldary túsirilgen 29 tolyqmetrajdy fılm daıyn tur.
Olardyń jartysynyń óndirisi endi ǵana aıaqtalyp jatsa, erterekte túsirilgen keı týyndylar túrli sebepke baılanysty áli de prokatqa shyqpaǵan, dep habarlaıdy Almaty-akshamy.kz «Ulttyq kınony qoldaý memlekettik ortalyǵy» KEAQ Baspasóz qyzmetine silteme jasap.
Osyǵan baılanysty Kıonoortalyqtyń basqarma tóraǵasy Qurmanbek Jumaǵalı bul fılmderdi 2024 jyly jaryqqa shyǵarý múmkindikterin talqylady. Onyń aıtýynsha, ulttyq birligimiz ben ıdeologıamyzdy dáripteıtin kınolardyń kórermenge qoljetimdi bolýy mańyzdy.
«Menen «bizdiń ulttyq fılmderimiz qaıda?» dep surap jatady. Bul óte oryndy saýal. Sebebi, sońǵy jyldary memleketimiz kınematografıa salasyna qomaqty qarjy bólgenimen, kórermen onyń nátıjesin kórmeı otyr. Fılmder túsiriledi, alaıda kóbi prokatqa shyqpaıdy. Ár týyndy túsirilip bolǵan soń sórede shań basyp qalmaýy tıis. Prokat bolsyn, festıvál bolsyn, strımıng platformalar, telearnalar arqyly bolsyn – otandyq kórermenge qoljetimdi bolýy kerek. Bul halyqtyń aqshasyna túsirilgen fılmder. Sondyqtan, jaýapkershilikti túsinip, onyń kórermenge jetýine kúsh salý qajet», - dedi Qurmanbek Jumaǵalı.
Ekranǵa shyqpaǵan týyndylardyń qatarynda tipti 2019 jylǵy konkýrstyń nátıjesinde túsirilgen fılmder bar. Avtorlardyń kóbi festıválderge qatysamyn dep uzaq ýaqyt júrip qalǵandaryn aıtty. Buǵan qosa tarıhı oqıǵalarǵa negizdelgen, uly tulǵalardyń mereıtoıyna arnalǵan jobalar da jeterlik. Bul fılmderdiń premerasy úlken oqıǵaǵa aınalyp, halyqqa durys jetýi asa mańyzdy dep atap ótti Kıonortalyq basshysy.
«Keıbir kınogerler bar. Bastapqyda memleket qarajatyna fılm túsirý úshin ózderiniń jobalaryn asyra maqtap, konkýrstan joldama alǵan. Biraq sońynda jobalaryn odan ári ilgeriletý jumystarynan ózderi bas tartqan. Bul degenimiz, olardyń memlekettik qarjyǵa degen tek tutynýshylyq kózqarasyn kórsetedi. Eger fılmniń kórermenge jetýi avtorlardyń ózine qyzyq bolmasa, ony túsirip ne qajet? Mundaı kompanıalar men avtorlar boıynsha Ortalyq bolashaqta bir sheshim shyǵaratyn bolady», - dedi Kınoortalyqtyń basqarma tóraǵasy.
Árıne, avtorlyq fılmderdiń orny bólek. Olar keminde bir jyl halyqaralyq festıválderdi aralap, ýaqytyn ótkizip alady. Ári mundaı týyndylardyń prokatqa shyǵýy da qıyn. Sebebi, qarapaıym kórermender avtorlyq kınolarǵa kóp bara bermeıdi. Degenmen, ony izdep júrip kóretin de kınosúıer qaýym bar. Sondyqtan, avtorlyq fılmderdiń de prokatqa shyǵýyna múmkindik berilý kerektigi erekshe aıtyldy. Tizimge Asqat Kýchınchırekovtyń «Baýyryna salý», Darhan Tólegenovtyń «Aǵaıyndy», Kenjebek Shaıqaqovtyń «Aıqaı», Serik Aprymovtyń «Aýyl» jáne taǵy basqa fılmder kiredi. Atalmysh kartınalardyń da prokaty kelesi jylǵa josparlanyp otyr.
Jaqsy jańalyǵymen qýantyp júrgen jobalar da joq emes. Mysaly, jýyrda ǵana jaryqqa shyqqan «Burkit» ekshn fılmi bir aıda otandyq prokattan qomaqty qarajat jınady. Al «Eva. Batyr qyz» sekildi derekti kartına sońǵy jartyjyldyqta 13 halyqaralyq kınofestıvalden júldeli oraldy. Baqyttas Sanıtastyń «Tezek» kartınasy qazir áıgili «Netflix» kompanıasymen kelsissózder júrgizýde. Ádilhan Erjanovtyń «Múıiztumsyq» atty kınosynyń álemdik premerasy kelesi jyly bedeldi Rotterdam kınofestıvalinde ótedi. Qoryta kelgende jınalǵan qaýym daıyn turǵan 29 joba 2024 jyly tolyǵymen jaryqqa shyǵýy kerek degen sheshimge keldi.
«Árbir fılmniń eń basty jeńisi – onyń óz kórermenin tabýy. Bizdiń maqsatymyz – ulttyq kınony halyqqa qoljetimdi etý. Sebebi, otandyq kıno eń áýeli ózimizdiń kórermenge qajet! Sol úshin barlyǵymyz – Kınoortalyq, fılm avtorlary jáne dıstrıbúterler birigip jumys isteýimiz kerek», - dep qorytyndylady Qurmanbek Jumaǵalı.