Aqrap Jubanovtyń 95 jyldyǵyna arnalǵan kórme ulttyq mádenıetti dáripteıdi
Ábilhan Qasteev atyndaǵy QR Memlekettik óner mýzeıinde qazaq beıneleý óneriniń kásibı deńgeıge jetýine, ónerdiń ár salasy boıynsha turaqty bilim alý júıesin qalyptastyrýǵa ózindik úlesin qosqan sýretshi-pedagog, qoǵam qaıratkeri, QR Sýretshiler odaǵynyń múshesi Aqrap Jubanovtyń 95 jyldyǵyna arnalǵan respýblıkalyq kórme ashyldy.
Bul kórmege Almaty, Astana, Aqtóbe, Shymkent, Taraz, Óskemen, Taldyqorǵannan jáne Almaty oblysynan 120 sýretshi qatysýda. Keskindeme, grafıka, músin, qoldanbaly ónerden bas-aıaǵy 150-ge jýyq týyndy qoıylǵan.
– Kórmeniń ereksheligi – 1963-1992 jyldar aralyǵynda sýretshi-pedagog Aqrap Qudaıbergenuly basshylyq etken N.V. Gogol atyndaǵy Almaty kórkemsýret ýchılıshesinde ár kezeńde bilim alǵan túlekter ustazǵa taǵzym retinde óz týyndylaryn kórermen nazaryna usynyp otyr. Bul kórmede tarıhtyń ótken saryny men búgingi aqıqatynda 85 jyldyq tarıhy bar bilim ordasymen taǵdyry tikeleı baılanysty óner sańlaqtarynyń shyǵarmashylyqtary zaman aǵymyna qaraı sabaqtasyp, qazaq beıneleý óneriniń edáýir órkendeý úrdisine úles qosqan sýretshilerdiń tulǵalyq beınesi aıqyndalady. Ekspozısıada sýretshilerdiń beıneleý men qoldanbaly óneriniń árbir janrda realısik, abstraksıalyq, avangardtyq, mınımalızmdik, konseptýaldyq mánerdegi kórkemdik ıdeıalaryn, zamanaýı kórkem shyǵarmashylyqtyń avtorlyq mánerin keńinen tanýǵa múmkindik beredi, – deıdi kórme jetekshisi Gúlnar Qýandyqqyzy.
Iá, búginde sol ónerdiń qara shańyraǵynda tárbıelenip, sýretshi atanǵan túlekterdiń ishinde esimderi tarıhta altyn árippen jazylǵan aǵa býyn óner sańlaqtary kórmede ómirlik tájirıbesin, ishki álemin, ózindik tulǵalyq mánerin, kreatıvti oı-tujyrymyn, ózgeshe potensıaldaryn ortaǵa salyp, maǵynaly da mándi týyndylaryn usynady. Sýretshilerdiń shyǵarmalary ulttyq tarıhty, mádenıetti, salt-dástúrdi dáripteıdi, búgingi kúngi áleýmettik taqyryptardan syr shertedi, oı-sanany san tarapqa jeteleıtin kompozısıalyq ıdeıalary, ondaǵy dınamıkalyq úndestik jáne ýaqyt keńistigindegi bolmys dáripteledi.
Sýretshi-pedagog Aqrap Qudaıbergenulynyń ákesi qazaq zıaly azamattarynyń bir, ǵalym-lıngvıst profesory, túriktanýshy, pedagog Qudaıbergen Qýanuly Jubanov (1899-1938). A.Q.Jubanov 1949 jyly N.V. Gogol atyndaǵy Almaty kórkemsýret ýchılıshesin, 1958 jyly Lenıngrad qalasyndaǵy V.I.Mýhın atyndaǵy VHPÝ-di bitirgen.
Aqrap Jubanovtyń 95 jyldyǵyna oraı uıymdastyrylǵan kórme jeltoqsannyń sońyna deıin jalǵasady.