Belgıanyń Flamand aımaǵyndaǵy Borgerhaýt qalasynda jeksenbi kúni keshkisin uzyndyǵy keminde 2 shaqyrym bolatyn aýyzashar dastarhany jaıyldy.
Aýyzashar sharasy Túrnhaýtsebaan kóshesinde uıymdastyryldy. Oǵan 6 myńǵa jýyq adam jınalǵan, dep habarlaıdy almaty-akshamy.kz.
«Bıyl katolıktik Pasqa meıramy musylmandardyń qasıetti Ramazan aıynyń ortasyna keledi. Sondyqtan biz aýyzashar úshin budan da kóp adam jınaǵymyz keldi», - dedi Belgıadaǵy ártúrli dıasporalardy biriktiretin FMV uıymynyń ókili Latıfa El Morabıt.
Aýyzasharǵa kelgender Palestınanyń kúrish taǵamdaryn, pasta salaty nemese Marokko sorpasynan dám tatty.
Ótken jyly Borgerhaýtta 1 shaqyrymdyq dastarhan basynda aýyzashar uıymdastyryldy. Aýdan ákimshiliginiń bastamasymen bıyl taǵy bir shaqyrym qosyldy.
Belgıalyq BAQ Katardyń Al Jazeera telekompanıasy Borgerhaýttaǵy «rekordqa» jeke reportaj arnaǵanyn qosty.