Атом саласының қызметкері күніне орай Ядролық физика институты Алматыдағы "Арбатта" өз қызметінің негізгі бағыттарын таныстырды. Институт 1957 жылы құрылған және ядролық физика мен радиациялық физика саласында іргелі және қолданбалы зерттеулермен, радиоизотоптар өндірісімен айналысатын Қазақстандағы жалғыз ғылыми ұйым болып табылады.
Институттың негізгі мақсаты – атом энергиясын бейбіт мақсатта пайдалану арқылы ғылым мен технологияларды дамыту және Қазақстанның индустриалды-инновациялық және әлеуметтік-экономикалық дамуына үлес қосу.
Институт Қазақстандағы радиоизотоптардың 90%-ын өндіреді, олар медицинада, атап айтқанда ПЭТ-КТ диагностикасында қолданылады. Медицина мен өнеркәсіпке арналған изотоп өндірісінде айтарлықтай жетістікке жетіп, 2022 жылы өндіріс көлемін 114%-ға арттырды және алғаш рет Германияға жеткізуді жүзеге асырды.
Институт зерттеу реакторы ВВР-К арқылы заманауи технологиялар үшін қажетті жартылай өткізгіштер мен микрочиптер өндірісіне қолданылатын кремнийдің легирленуін жүзеге асырады. Сонымен қатар, институт гидрогелевтік таңу материалдарын, медициналық өнімдерді стерилизациялау және тіпті топаздарды бояуға арналған технологияларды ұсынады.
Сонымен қатар, ИЯФ ғалымдары медициналық бұйымдардың радиациялық стерилизациясын жүзеге асырады. Иондық сәуле арқылы медициналық өнімдер толықтай стерильді болады және бұл стерильдік бүкіл қолдану мерзімі ішінде сақталады.
Институт соңғы бес жылда ғылыми зерттеу орталықтары арасында ең көп жарияланған ғылыми жұмыстар саны бойынша бірінші орында тұр. Сонымен қатар, Web of Science және Scopus базаларында Қазақстанның үздік бес ғылыми мекемесінің қатарына кіреді.
Кездесу барысында атом энергетикасының қазіргі әлемдегі орны және оның маңыздылығы туралы кеңінен әңгіме қозғалды. Қазанның 6-сы күні Қазақстанда өтетін АЭС құрылысына арналған референдум қарсаңында институт мамандары халыққа атом энергетикасының ерекшеліктері мен оның өмірдегі маңызы туралы түсіндіріп, кеңінен ақпарат беріп келеді.