بۇل تۋرالى بانكتىڭ باسپا ءسوز قىزمەتى مالىمدەدى.
بۇعان دەيىن Kaspi Biz Birgemiz Qazaqstan قورى ارقىلى 620 ملن تەڭگە ءبولدى، دەپ حابارلايدى Almaty-akshamy.kz.
Kaspi.kzء-تىڭ نەگىزىن قالاۋشىلار ۆياچەسلاۆ كيم مەن ميحايل لومتادزە سۋ تاسقىنىنان زارداپ شەككەن قازاقستاندىقتارعا كومەكتەسۋ ءۇشىن 20 ميلليارد تەڭگە بولەدى. قاراجات سولتۇستىك قازاقستان جانە اقمولا وبلىستارىندا تۇرعىن ۇيلەردى جوندەۋگە، ساتىپ الۋعا جانە سالۋعا جۇمسالادى.
Kaspi.kz ديرەكتورلار كەڭەسىنىڭ ءتوراعاسى جانە نەگىزىن قالاۋشىلاردىڭ ءبىرى ۆياچەسلاۆ كيم:
«باسپاناسىز قالعان ادامدار ءۇشىن بۇكىل ەلىمىزبەن بىرگە ۋايىمدايمىز. مىڭداعان وتباسىلار كوشىرىلدى، ولار ءوز ۇيلەرىنە قاشان ورالاتىنى بەلگىسىز. كەيبىر ەلدى مەكەندەردە سۋ ءالى دە كوتەرىلىپ جاتىر. بۇل اپات ەشكىمدى بەيجاي قالدىرمايدى. مەملەكەت، بيزنەس جانە ءبىزدىڭ ازاماتتار زارداپ شەككەن ايماقتارداعى ادامداردىڭ ءومىرىن قالپىنا كەلتىرۋ ءۇشىن بارىن سالۋدا. ءبىز مەملەكەت باسشىسىنىڭ زارداپ شەككەندەرگە كومەك كورسەتۋ تۋرالى شاقىرۋىنا قولداۋ كورسەتىپ، سۋ تاسقىنىنىڭ سالدارىن جويۋعا 20 ميلليارد تەڭگە باعىتتايمىز».
Kaspi.kz باسقارما ءتوراعاسى جانە نەگىزىن قالاۋشىلاردىڭ ءبىرى ميحايل لومتادزە:
«زارداپ شەككەن ايماقتاردا ءبىزدىڭ سۇيىكتى كليەنتتەرىمىز، سەرىكتەستەرىمىز، قىزمەتكەرلەرىمىز تۇرادى. ءبىز سۋ تاسقىنىنىڭ العاشقى كۇندەرىنەن باستاپ ولارمەن ۇنەمى بايلانىستامىز جانە جاعدايدى جاقسى بىلەمىز. ءبىز بىردەن Kaspi.kz ءموبيلدى قوسىمشاسىندا قايىرىمدىلىق كومەگىن جيناۋدى ۇيىمداستىردىق جانە Biz Birgemiz Qazaqstan قورىنا قۇتقارۋ تەحنيكاسىن، جابدىقتار امۋنيسيانى، جانارماي جانە باسقا دا العاشقى كومەككە قاجەتتى زاتتاردى ساتىپ الۋعا قاراجات اۋداردىق. وكىنىشكە قاراي، ءبىرقاتار ايماقتاردا جاعداي ءالى دە قيىن. ءبىز پرەزيدەنتتىڭ باستاماسىن قولداۋ جانە وسى قيىن ساتتە ەلگە پايدالى بولۋ ءوزىمىزدىڭ ازاماتتىق بورىشىمىز دەپ ەسەپتەيمىز».
ناۋرىز ايىنىڭ سوڭىندا Kaspi كومانداسى Kaspi.kz قوسىمشاسىندا ونلاين-قىزمەت ۇيىمداستىردى. ونىڭ كومەگىمەن جاعدايعا بەي-جاي قارامايتىن ءاربىر قازاقستاندىق زارداپ شەككەندەرگە كومەكتەسۋ ءۇشىن Biz Birgemiz Qazaqstan قورىنا قاراجات اۋدارا الادى. Kaspi.kz كومپانياسىنىڭ ءوزى جولداردى جوندەۋگە، قۇتقارۋ تىكۇشاقتارىنىڭ جۇمىسىن قامتاماسىز ەتۋگە، گەنەراتورلاردى، سورعىلاردى، ۇرلەمەلى قايىقتار مەن دارى-دارمەكتەردى ساتىپ الۋعا قورعا 620 ملن تەڭگە باعىتتادى. سونداي-اق، وتكەن اپتادا ۆياچەسلاۆ كيم اقمولا وبلىسىندا 5 قاباتتى تۇرعىن ءۇي قۇرىلىسىنىڭ جوباسىن قارجىلاندىردى جانە زارداپ شەككەن ەلدى مەكەندەردىڭ ينفراقۇرىلىمىن قالپىنا كەلتىرۋگە قاراجات ءبولدى.