قىتايتانۋشى ن.مۇقامەتحانۇلىمەن كەزدەسۋ ءوتتى
قازىرگى تاڭدا قازاقستاندى قامتىعان ورتالىق ازيا ايماعىندا يسلام الەمىنىڭ، جۇڭگو مەن ءۇندىستان سىندى سىرتقى جاڭا كۇش ورتالىقتارىنىڭ بەلسەندىلىگى بارعان سايىن ارتۋدا. بۇل ءۇردىس ەلىمىزدەگى شىعىستانۋ جانە قىتايتانۋ عىلىمىن جۇيەلى دامىتۋدى مىندەتتەپ وتىر. بۇگىن، 17 ساۋىردە الماتىدا بەلگىلى قىتايتانۋشى عالىم ءنابيجان مۇقامەتحانۇلىمەن اتالعان سالاداعى زەرتتەۋشىلەر جانە جاس عالىمداردىڭ كەزدەسۋىندە وسىعان قاتىستى تىڭ ۇسىنىستار مەن جاڭا ويلار ورتاعا سالىندى.
ر.ب.سۇلەيمەنوۆ اتىنداعى شىعىستانۋ ينستيتۋتى ۇيىمداستىرعان كەزدەسۋ بەلگىلى عالىم، ق ر ۇعا قۇرمەتتى اكادەميگى، تاريح عىلىمىنىڭ دوكتورى، پروفەسسور ءنابيجان مۇقامەتحان ۇلىنىڭ مەرەيلى 70 جاسىنا وراي وتكىزىلدى. كەزدەسۋدە وتاندىق شىعىستانۋ جانە قىتايتانۋ سالاسىنىڭ ماقساتى مەن مىندەتتەرى، سالانىڭ دامۋى مەن كەزدەسىپ وتىرعان ماسەلەلەرى تالقىلاندى. اتالعان عىلىم باعىتىنداعى زەرتتەۋشىلەر، عالىمدار جانە ستۋدەنتتەر اراسىندا ءوزارا پىكىر الماستى.
شارا بارىسىندا شىعىستانۋ ينستيتۋتىنىڭ ديرەكتورى، بەلگىلى عالىم دۇكەن ءماسىمحان ۇلى عىلىمداعى ارىپتەس اعاسى ن.مۇقامەتحان ۇلىنىڭ ءومىربايانى، عىلىمداعى ەڭبەك جولىمەن تانىستىرىپ، مەرەيلى 70 جاسىمەن قۇتتىقتادى. ءارى ينستيتۋت اتىنان «شىعىستانۋ عىلىمىنا قوسقان ۇلەسىڭىز ءۇشىن» مەدالىن تاعىپ، عالىمنىڭ عىلىمداعى ەڭبەگىنە قۇرمەت كورسەتتى.
كەزدەسۋدە عالىم ەلىمىزدەگى قىتايتانۋ جانە شىعىستانۋ سالالارىنىڭ ماسەلەلەرىن تالدادى. سالانى دامىتۋ بويىنشا ويلارى مەن ۇسىنىستارىن ورتاعا سالدى. ءارى جاس زەرتتەۋشىلەردىڭ سۇراقتارىنا جاۋاپ بەرىپ، ەلىمىزدىڭ ۇلتتىق مۇددەسىنە قاتىستى، سونداي-اق، ءبىرقاتار گەوساياسي ماسەلەلەر بويىنشا دا ءوز كوزقاراستارىمەن ءبولىستى.
ن.مۇقامەتحانۇلىمەن كەزدەسۋدە قازاق-قىتاي قارىم-قاتىناسىنىڭ بولاشاعى، رەسەي-قىتاي قاتىناستارىنىڭ دامۋى جانە ونىڭ بىزگە جاسايتىن ىقتيمال مۇمكىندىكتەرى مەن سىن-قاتەرلەرى تۋرالى دا كەڭ تالقى ورىستەدى. بۇل تۋرالى تولىعىراق «الماتى اقشامى» باسىلىمىنىڭ الداعى سانىنان وقي الاسىزدار.