استانادا وتكەن V دۇنيەجۇزىلىك كوشپەندىلەر ويىندارى اياسىندا الماتى قالاسى تۋريستىك، تاريحي جانە سپورتتىق ورتالىق رەتىندە كەڭىنەن تانىستىرىلدى. «كوشپەندىلەر الەمى» ەتنواۋىلىندا Welcome to Almaty دەپ اتالاتىن فۋتۋريستىك كيىز ءۇي اشىلدى.
ورتالىق 12 قاناتتى كيىز ۇيگە كەلگەندەر الماتىنىڭ كوركى كوز تارتار تابيعي سۇلۋلىعىن، قالا پەيزاجىن، ينفراقۇرىلىمى مەن تۇرعىندارىن كورە الادى. ۆيزۋالدى جانە دىبىستىق ەففەكتىلەردىڭ ارقاسىندا قوناقتار قالانىڭ اتموسفەراسىنا ەنىپ، شاھاردىڭ ەرەكشە رۋحىن سەزىنە ءبىلدى. دوڭگەلەك جانە ەدەندەگى LED ەكراندار جوعارى تەحنولوگيالىق ارنايى ەففەكتىلەر ارقىلى تۋريستەردى قايران قالدىرىپ، كوشپەندىلەردىڭ باسپاناسىنا ەنگەندەي اسەرگە بولەدى.
كورشىلەس «ۇلتتىق قازىنا» اتتى كيىز ۇيدە ىقىلاس اتىنداعى حالىق مۋزىكالىق اسپاپتار مۋزەيى قازاقتىڭ ۇلى اقىندارىنىڭ، كۇيشى-كومپوزيتورلارىنىڭ جانە جىراۋلارىنىڭ مۋزىكالىق اسپاپتارىنىڭ كوشىرمەسى، سونداي-اق قازاقتىڭ ەجەلگى حالىق اسپاپتارى قويىلعان ەرەكشە توپتاما ۇسىنىلدى. قحر، برازيليا، مالايزيا، يتاليا جانە نيدەرلاندىدان كەلگەن تۋريستەردىڭ ەرەكشە قىزىعۋشىلىعىن تۋعىزعان ەكسپوزيسيا حالىق مۋزىكانتتارىنىڭ ورىنداۋىنداعى كۇيلەردىڭ «جاندى» دىبىسىمەن سۇيەمەلدەندى.
ال ءۇشىنشى كيىز ءۇي قازاقتىڭ ءداستۇرلى مادەنيەتىنىڭ ەجەلگى ەلەمەنتى «ءبىز كەستەگە» ارنالعان. بۇل كيىز ۇيدە الماتىلىق شەبەر-سۋرەتشى زەينەلحان مۇحامەدجان ۇلىنىڭ كورمەسى ۇيىمداستىرىلعان. مۇندا شەبەردىڭ ىلمەك پەن ءتۇرلى-تۇستى جىپتەر ارقىلى جاساعان قۇندى بۇيىمدارى قويىلعان. نيەت بىلدىرۋشىلەر شەبەرلىك دارىستەرىنە قاتىسا الادى.
الماتىلىق كيىز ۇيلەردىڭ كورمەسىنە العاشقى كۇنى-اق 5000-نان استام ادام كەلدى. قوناقتاردى ەرەكشە اسەرگە بولەگەن تاعى ءبىر نارسە – جەتىسۋدىڭ بارلىق مادەني سۇرىپتى الما اعاشىنىڭ اتاسى – سيۆەرس الماسى بەينەلەنگەن ب ا ق دەكوراسياسى ەدى.
سونداي-اق، الماتى «ۇلى دالا ءۇنى» اتتى اۋقىمدى كونسەرت ۇسىندى. وعان روزا رىمبايەۆا، مايرا مۇحامەد قىزى، ايگۇل قوسانوۆا، زارينا التىنبايەۆا، Aray توبى، Ulytau ەتنو-روك توبى، «تۇران» ءانسامبلى، «سازگەن سازى» فولكلورلىق-ەتنوگرافيالىق ءانسامبلى، «سلاۆيان بازارى» بايقاۋىنىڭ لاۋرەاتتارى مەن جۇلدەگەرلەرى شەرحان ارىستان، ەرنازار جۇبان جانە DJ Prashkevich سىندى وتاندىق ەسترادا جۇلدىزدارى مەن اتى اڭىزعا اينالعان ونەرپازدار قاتىسىپ، كورەرمەندەردى ءتانتى ەتتى.