ەلىمىزدە وتكەن «ۇزدىك اۋىل اكىمى» رەسپۋبليكالىق بايقاۋىندا تۇركىستان وبلىسى شاردارا اۋدانى جاۋشىقۇم اۋىلدىق وكرۋگىنىڭ اكىمى نۇرباقىت نۇرسەيىتوۆ جەڭىمپاز اتاندى.
قازاقپارات دەرەگىنشە، ەلىمىزدەگى ەڭ ۇزدىك اكىممەن سۇحباتتاسىپ، ونىڭ جوسپار-جوبالارىمەن تانىسىپ قايتتى، دەپ حابارلايدى Almaty-akshamy.kz
نۇرباقىت نۇرسەيىتوۆ قىزمەت اتقاراتىن «جاۋشىقۇم» اۋىلدىق وكرۋگىندە 5 ەلدى مەكەن بار. وندا جالپى 2500-عا جۋىق حالىق تۇرادى.
جەرگىلىكتى تۇرعىنداردىڭ باسىم بولىگى اۋىل شارۋاشىلىعىمەن اينالىسادى. ءتورت تۇلىك ءوسىرىپ، مال باسىن كوبەيتىپ وتىرعاندارى دا بار.
بۇگىندە نۇرباقىت نۇرسەيىتوۆ اۋىلداعى 12 مىڭ گەكتار القاپتى سۋلاندىرۋ جوباسىن قولعا الىپ وتىر.
شاردارا سۋ قويماسىنان ارنايى سۋ جۇيەسىن تارتىپ، قۇرعاپ جاتقان ۇلكەن اۋماقتى ەگىستىك القابىنا اينالدىرماق.
جاس اكىم بۇل جۇمىسىن رەسپۋبليكالىق بايقاۋدا قورعاپ شىقتى. ەل يگىلىگىنە ارنالعان جوبانى بايقاۋدىڭ باقىلاۋشىلارى دا جوعارى باعالادى.