قازاقستاندا اۋىل مەكتەپتەرىن، مۇعالىمدەردىڭ كوشباسشىلىق داعدىلارىن دامىتۋ جانە قىزدار كوشباسشىلىعىن قولداۋ ماقساتىندا ماڭىزدى باستامالار جۇزەگە اسىرىلۋدا. الماتىدا وتكەن «اۋىل مەكتەپتەرىن ترانسفورماسيالاۋ: قازاقستانداعى مۇعالىمدەردىڭ كاسىبي قاۋىمداستىعىن دامىتۋ» كونفەرەنسياسىندا وسى ماسەلەلەر كەڭىنەن تالقىلاندى، دەپ حابارلايدى aqshamnews.kz
ءىس-شارا «اۋىلدىق مەكتەپ شامى» پيلوتتىق جوباسى اياسىندا ۇيىمداستىرىلدى. جوبا اۋىل مەكتەپتەرىن قولداۋعا جانە مۇعالىمدەردىڭ كوشباسشىلىعى ارقىلى كاسىبي قاۋىمداستىقتاردى دامىتۋعا باعىتتالعان.
«بۇگىن قازاق ۇلتتىق قىزدار پەداگوگيكالىق ۋنيۆەرسيتەتىندە ماڭىزدى كونفەرەنسيا ءوتىپ جاتىر. «اۋىلدىق مەكتەپ شامى» جوباسى ماڭعىستاۋ، اتىراۋ جانە الماتى وبلىستارىنداعى اۋىل مەكتەپتەرىندە جۇزەگە اسىرىلدى. جوبانىڭ باستى ماقساتى – مۇعالىمدەردىڭ كاسىبي دامۋىن قامتاماسىز ەتۋ. قازىرگى تاڭدا ەلىمىزدە «ءومىر بويى ءبىلىم الۋ» تۇجىرىمداماسى ىسكە اسىرىلۋدا. وسى ايادا ۋنيۆەرسيتەتىمىزدە بولاشاق ۇستازداردى دايارلاۋ باعىتىندا اۋقىمدى جوبالار قولعا الىنعان. سولاردىڭ ءبىرى – ساباقتى زەرتتەۋ ءادىسى. سونىمەن قاتار مەكتەپ مۇعالىمدەرى جۇرگىزىپ جاتقان جوبالار دا ءبىلىم بەرۋ ۇيىمدارى مەن قوعامداعى وزەكتى ماسەلەلەردى قامتيدى. ءاربىر ۇستاز ءوز دامۋ جوباسى ارقىلى وقۋ جىلى بويى مەكتەپ ىشىندە ناقتى وزگەرىستەر ەنگىزۋگە ۇلەس قوسادى. بۇگىنگى كونفەرەنسيا – وسى تاجىريبەلەرمەن ءبولىسىپ، مۇعالىمدەردىڭ ەنگىزگەن جاڭاشىلدىقتارىن تانىستىرۋعا ارنالعان. ۋنيۆەرسيتەتىمىز الداعى ۋاقىتتا دا مەكتەپ مۇعالىمدەرىنىڭ كاسىبي دامۋىن قولداپ، وسى باعىتتاعى جۇمىسىن جالعاستىرا بەرەدى. بۇل – ءبىزدىڭ باستى ماقساتتارىمىزدىڭ ءبىرى»، – دەدى QyzPU رەكتورى گۇلميرا قاناي
كونفەرەنسياعا مۇعالىمدەر، مەكتەپ ديرەكتورلارى، ءبىلىم سالاسىنداعى ساراپشىلار، مەملەكەتتىك، حالىقارالىق جانە ۇكىمەتتىك ەمەس ۇيىمداردىڭ وكىلدەرى قاتىستى. قاتىسۋشىلار جوبانىڭ نەگىزگى ناتيجەلەرىن، اۋىلدىق ءبىلىم بەرۋدى ترانسفورماسيالاۋ تاجىريبەلەرىن جانە مۇعالىمدەردىڭ كاسىبي قاۋىمداستىعىن دامىتۋ پەرسپەكتيۆالارىن تالقىلادى.
«اۋىل مەكتەپتەرىن دامىتۋعا باعىتتالعان جۇمىستار جۇيەلى تۇردە جۇرگىزىلۋدە. ەلدىڭ ءار وڭىرىندە ءتۇرلى جوبالار ىسكە اسىرىلىپ، اۋىلدىق جەرلەردە زاماناۋي مەكتەپتەر سالىنىپ، ولاردىڭ ماتەريالدىق-تەحنيكالىق بازاسى جاڭارتىلۋدا. دەگەنمەن، ساپالى ءبىلىم بەرۋ ءۇشىن ەڭ الدىمەن پەداگوگتەردىڭ بىلىكتىلىگىن ارتتىرۋ ماڭىزدى. وسى تۇرعىدا «اۋىلدىق مەكتەپ شامى» پيلوتتىق جوباسى اۋىل مەكتەپتەرىنىڭ الەۋەتىن كوتەرۋگە ارنالعان ماڭىزدى باستامالاردىڭ ءبىرى. جوبانىڭ قورىتىندى كونفەرەنسياسىنىڭ قازاق ۇلتتىق قىزدار پەداگوگيكالىق ۋنيۆەرسيتەتىندە ءوتۋى دە ەرەكشە مانگە يە، سەبەبى بۇل ۋنيۆەرسيتەت بىلىكتى پەداگوگتەردى دايارلاۋ ىسىندە جەتەكشى ورىن الادى»، – دەپ اتاپ ءوتتى ق ر وقۋ-اعارتۋ مينيسترلىگى ورتا ءبىلىم بەرۋ كوميتەتى ءتوراعاسىنىڭ ورىنباسارى جومارت كارامبايەۆ.
«اۋىلدىق مەكتەپ شامى» جوباسى الماتىداعى يۋنەسكو-نىڭ وڭىرلىك كەڭسەسىنىڭ جانە قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ قولداۋىمەن جۇزەگە اسىرىلدى. سونىمەن قاتار جوباعا HertsCam كاسىبي قاۋىمداستىعى (كەمبريدج، ۇلىبريتانيا)، قازاق ۇلتتىق قىزدار پەداگوگيكالىق ۋنيۆەرسيتەتى (مۇعالىمدەردى سەرتيفيكاتتاۋ جونىندەگى جاۋاپتى ۇيىم) جانە TeachersLab تاۋەلسىز پلاتفورماسى (فاسيليتاتورلاردى قولداۋ جونىندەگى جاۋاپتى ۇيىم) قاتىستى.
«بۇل جوبا قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ قارجىلىق قولداۋىمەن ءوز جۇمىسىن باستادى. جوبانىڭ باستى ەرەكشەلىگى – اۋىلدىق مەكتەپتەردە مۇعالىمدەردىڭ كوشباسشىلىعىن دامىتۋ ارقىلى كاسىبي قاۋىمداستىقتار قۇرۋ. ياعني، مۇعالىمدەر جىل بويى مەكتەپ ىشىندە بەلگىلى ءبىر ماسەلەنى تاڭداپ، كاسىبي ورتا قالىپتاستىرىپ، ونى تالقىلاپ، شەشۋدىڭ ءتۇرلى جولدارىن ىزدەستىردى. جوبا اياسىندا ءتۇرلى مۇمكىندىكتەر قاراستىرىلدى. مىسالى، مەكتەپ ىشىندە ارنايى دايىندالعان فاسيليتاتورلار بار. ولار سەسسيالاردى ۇيىمداستىرىپ، مۇعالىمدەرگە كاسىبي ماسەلەلەرىن تالقىلاۋعا كومەكتەسەدى جانە ءتيىمدى شەشىمدەر تابۋعا باعىتتايدى. مۇعالىمدەر زەرتتەۋ ادىستەرىن قولدانا وتىرىپ، ءوز جوبالارىن ازىرلەپ، ىسكە اسىردى. بۇگىنگى كونفەرەنسيادا وسى جوبالار ۇسىنىلىپ وتىر»، – دەيدى يۋنەسكو-نىڭ الماتىداعى وڭىرلىك كەڭسەسىنىڭ ءبىلىم بەرۋ باعدارلاماسى بويىنشا ۇلتتىق مامانى مەيىرگۇل الپىسبايەۆا.
كونفەرەنسيا سوڭىندا مۇعالىمدەر وزدەرىنىڭ شاعىن زەرتتەۋ جۇمىستارىن پوستەرلىك سەسسيا فورماتىندا تانىستىردى. بۇل زەرتتەۋلەر قازاق، ورىس جانە اعىلشىن تىلدەرىن ۇيرەتۋ، وقۋشىلاردىڭ وقۋ داعدىلارىن دامىتۋ، پانگە دەگەن قىزىعۋشىلىعىن ارتتىرۋ سەكىلدى تاقىرىپتاردى قامتىدى.
«اۋىلدىق مەكتەپ شامى» – اۋىلدىق ءبىلىم بەرۋ جۇيەسىن جاقسارتۋعا باعىتتالعان ماڭىزدى جوبا. بۇل كونفەرەنسيا اۋىل مۇعالىمدەرىنىڭ ءوز ىسىنە شىنايى بەرىلگەندىگىن، جاڭا ادىستەردى مەڭگەرۋگە دايىن ەكەندىگىن كورسەتتى.
