بيىل الماتىدا بەينەباقىلاۋ كامەرالارىنىڭ كومەگىمەن 272 قىلمىستىڭ بەتى اشىلعان. ال قۇرىلعىلارعا جاقىندا عانا ەنگىزىلگەن جاڭا فۋنكسيا كولىگىن تۇراققا دۇرىس قويماعان 900 جۇرگىزۋشىنى انىقتاپتى. قالانىڭ تىنىشتىعىن كۇزەتەتىن ءارى بۇزاقىلاردى ۇستاۋعا جاردەمدەسەتىن بەينەكامەرالاردىڭ سانى بۇگىندە قانشاعا جەتكەن؟ ولار تاعى نەندەي قىزمەتكە جاراپ جاتىر؟ وسى جانە وزگە دە سۇراقتارعا «الماتى» تەلەارناسىنىڭ ستۋديا قوناعى قالالىق پوليسيا دەپارتامەنتىنىڭ رەسمي وكىلى سالتانات ازىربەك جاۋاپ بەردى، دەپ حابارلايدى aqshamnews.kz
– الماتىدا بەينەكامەرالاردىڭ سانى بۇگىندە قانشاعا جەتكەن؟
"الماتى پوليسياسىنىڭ قىزمەتكەرلەرى قوعامدىق ءتارتىپتى قامتاماسىز ەتۋدە جانە قىلمىستىلىقپەن كۇرەسۋدە 176 مىڭ بەينەكامەرانىڭ كومەگىن پايدالانۋدا. بۇل قوعامدىق ءتارتىپتى عانا ەمەس، سونىمەن قاتار جول قاۋىپسىزدىگىن قامتاماسىز ەتۋدى، ءىس-تۇسسىز جوعالعان ازاماتتاردى، قىلمىسكەرلەردى ىزدەۋدە سەپتىگى زور. بىلتىر بەينەكامەرالاردىڭ كومەگىمەن 3،5 مىڭنان اسا قىلمىستىڭ بەتى اشىلدى. سونىمەن قاتار قالامىزداعى جول احۋالىن زەردەلەۋ، باقىلاۋ كەزىندە 3 ميلليوننان استام جول ءجۇرۋ ەرەجەسى انىقتالدى. بۇل – وتە جاقسى ستاتيستيكا. ايتا كەتەيىك، قالامىزداعى بەينەكامەرالارعا جاڭا فۋنكسيا ەنگىزىلدى. اسىرەسە قوعامدىق ورىنداردا ورنالاستىرىلعان بەينەكامەرالاردا بەت تانۋ فۋنكسياسى بار. ىزدەۋدە جۇرگەن ازامات بەينەكامەرالاردىڭ توڭىرەگىنەن وتسە، مىندەتتى تۇردە دابىل قاعىپ، پوليسيا قىزمەتكەرلەرى ۇستاۋعا باعىتتالعان ءىس-شارالاردى قولعا الادى".
– جاڭا فۋنكسيالار قانداي ناتيجە بەرىپ جاتىر؟ زاڭ بۇزعاندارعا قاتىستى دەرەك بىلتىرعىمەن سالىستىرعاندا قانشاعا ازايدى؟
"ارينە بەينەكامەرالاردىڭ ءرولى وتە زور. ۇلكەن مەگاپوليستە قوعامدىق ءتارتىپتى قامتاماسىز ەتۋدە، تەك ادامي فاكتور ەمەس، جاڭا تەحنولوگيا – ءبىز ءۇشىن كومەك. بەينەكامەرا بار جەردە قىلمىس وتە سيرەك بولادى. قوعامدىق ورىنداردا وتكەن جىلعى ەكى ايمەن سالىستىرساق، بيىل 27 پايىزعا قىلمىس سانى ازايدى. بۇل –ونىڭ تارتىپتىك ءرولىنىڭ بىردەن ءبىر ايقىن بەلگىسى".