ءتۋريستىڭ ءومىرىن ساقتاپ قالۋ ءۇشىن وعان شۇعىل تۇردە وتا جاساۋ قاجەت بولدى
44 جاسار فەرناندو بودەلون بۇعان دەيىن دەنساۋلىعىنا شاعىمدانىپ كورمەگەن. مادريدتەن قازاقستاننىڭ تانىمال تۋريستىك باعىتتارى بويىنشا ساياحاتتاپ كورۋ ءۇشىن الماتىعا ۇشىپ كەلمەكشى بولعان. ۇشاقتا، قونۋعا بىرنەشە ساعات قالعاندا ءوزىن ناشار سەزىنگەن، دەپ حابارلايدى Almaty-akshamy.kz.
«ۇشاقتا مەنىڭ موينىم اۋىرىپ، كۇرت بوزارىپ كەتتىم، قايتا-قايتا قۇستىم. سودان كەيىن سول قول مەن سول اياقتا السىزدىك پايدا بولدى. الماتى اۋەجايىنا قونعان سوڭ مەنى جەدەل جاردەم دارىگەرلەرى كۇتىپ الدى»، – دەپ ەسكە الادى فەرناندو بودەلون.
ءتورتىنشى قالالىق اۋرۋحانانىڭ قابىلداۋ بولىمىنە كەلگەن كەزدە ءتۋريستىڭ جاعدايى اۋىر دەپ باعالانعان. №4 قالالىق كلينيكالىق اۋرۋحانانىڭ نەيروحيرۋرگتەرى شەتەلدىك قوناقتىڭ ءومىرى ءۇشىن 27 كۇن بويى كۇرەستى.
«ميعا جاسالعان كت وڭ گەميسفەرانىڭ قىرتىس استى يادرولارى ايماعىندا قارىنشالىق جۇيەنىڭ بۇزىلۋىن، گەمورراگيالىق ءتيپتى مي قان اينالىمىنىڭ جەدەل بۇزىلۋىن، ميدىڭ ءىسىنۋىن كورسەتتى. ناۋقاس شۇعىل تۇردە جانساقتاۋ بولىمىنە جاتقىزىلدى»، - دەيدى №4 قالالىق كلينيكالىق اۋرۋحانانىڭ قابىلداۋ ءبولىمىنىڭ مەڭگەرۋشىسى ماگادين حايرويەۆ.
ءتۋريستىڭ ءومىرىن ساقتاپ قالۋ ءۇشىن وعان شۇعىل تۇردە وتا جاساۋ قاجەت بولدى. ءىستى نەيروحيرۋرگيا ءبولىمىنىڭ مەڭگەرۋشىسى نۇرجان اجىبەكوۆ، اسسيستەنت ەلدار بەسەنوۆ جانە انەستەزيولوگ مارجان مۋسينا قولعا الدى. وتا 60 مينۋتقا سوزىلىپ، ءساتتى اياقتالدى - دارىگەرلەر مي قان اينالىمىن قالپىنا كەلتىرە الدى.
«ءبىز مي ىشىندەگى گەماتومانىڭ درەناجىن جاسادىق. وتادان كەيىنگى كەزەڭ تۇراقتى-اۋىر تۇردە ءوتتى، ناۋقاستا وڭ ديناميكا ورىن الادى. اۋرۋحاناداعى باقىلاۋدان كەيىن فەرناندونىڭ جاعدايى جاقسارىپ، ۇيگە شىعارىلدى»، - دەيدى ەمدەۋشى دارىگەر №4 قالالىق كلينيكالىق اۋرۋحانانىڭ نەيروحيرۋرگى الدونگار ايساۋتوۆ.
فەرناندو بودەلون اۋرۋحانادان شىققاننان كەيىن بىردەن يسپانياعا ورالدى، وندا ول وڭالتۋ كۋرسىنان وتەدى. بولاشاقتا تۋريست ءوزىنىڭ باستاعان ساپارىن جالعاستىرىپ، ەكىنشى تۋعان جەرى - قازاقستانعا قايتا ورالۋدى جوسپارلاپ وتىر.
«مەن بۇل كلينيكانى، دارىگەرلەر مەن قىزمەتكەرلەردى قاشاندا جىلى لەبىزبەن ەسكە الامىن. ماعان ومىرگە ەكىنشى مۇمكىندىك بەرگەنىڭىز ءۇشىن راحمەت»، - دەيدى فەرناندو بودەلون.