تۇجىرىمداما جاستار ساياساتى باعىتىنداعى نەگىزگى قۇجاتقا اينالادى
قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەستىڭ كەزەكتى وتىرىسى ءوتتى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
وتىرىس بارىسىندا مەملەكەتتىك كەڭەسشى ەرلان قارين كەڭەستە ماڭىزدى قۇجاتتاردىڭ ءبىرى – جاستار ساياساتىنىڭ جاڭا تۇجىرىمداماسى ازىرلەنەتىنىن اتاپ ءوتتى. تۇجىرىمداما جاستار ساياساتى باعىتىنداعى نەگىزگى قۇجاتقا اينالادى.
تۇجىرىمدامانى ازىرلەۋ كەزىندە جىل سايىنعى «جاستار» ۇلتتىق بايانداماسىنىڭ تالدامالىق دەرەكتەرى، تاۋەلسىز الەۋمەتتىك زەرتتەۋلەر، ساراپتامالىق جانە قوعامدىق پىكىرتالاستار بارىسىندا قالىپتاسقان ۇسىنىستار مەن ۇسىنىمدار پايدالانىلادى.
سونىمەن قاتار جاستار ساياساتى جونىندەگى كەڭەستە جاستار اراسىندا سينتەتيكالىق ەسىرتكىنىڭ تارالۋىنا قارسى ءىس-قيمىل ماسەلەلەرى تالقىلاندى.
مەملەكەت باسشىسى ءوزىنىڭ وتكەن جىلعى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا «ەسىرتكىنىڭ، ونىڭ ىشىندە سينتەتيكالىق ەسىرتكىنىڭ تارالۋى بولاشاق ۇرپاقتىڭ تامىرىنا بالتا شابادى» دەپ اتاپ ءوتتى.
تالقىلاۋعا كەڭەس مۇشەلەرى، سونداي-اق ىشكى ىستەر ءمينيسترى مارات احمەتجانوۆ، دەنساۋلىق ساقتاۋ ءمينيسترى اجار عينيات، «سول» دەرەكتى ءفيلمىنىڭ رەجيسسەرى جانە پروديۋسەرى رينات بالعابايەۆ قاتىسىپ، سينتەتيكالىق ەسىرتكىنىڭ تارالۋىنا قارسى كۇرەس پەن وعان قارسى ءىس-قيمىل، ناشاقورلىقتىڭ الدىن الۋ جانە ەمدەۋ ماسەلەلەرى بويىنشا جۇرگىزىلىپ جاتقان جۇمىستار تۋرالى ايتىپ بەردى.
سونداي-اق كەڭەس وتىرىسىنا سالالىق ۇەۇ وكىلدەرى مەن ساراپشىلار بەلسەندى قاتىسىپ، ناشاقورلىقتىڭ الدىن الۋ بويىنشا ءوز ۇسىنىستارىن ايتتى.
كەڭەس وتىرىسىنىڭ قورىتىندىسى بويىنشا مەملەكەتتىك ورگاندار ءۇشىن اقپاراتتىق-پروفيلاكتيكالىق جۇمىسقا جۇرتشىلىقتى بەلسەندى تارتا وتىرىپ جۇزەگە اسىرىلاتىن ناقتى ۇسىنىمدار ازىرلەندى.