ۇشاق رەيسى كەشىكسە، نە ىستەي الامىز؟

ۇشاقتىڭ كەشىگۋى ۇنەمى قولايسىزدىق تۋدىرادى. مۇندايدا جولاۋشى وتەماقى تالاپ ەتە الا ما؟ بۇل ءۇشىن قانداي زاڭدارعا سۇيەنۋگە بولادى؟ تولىعىراق اqshamnews.kz ماتەريالىندا. 

قازاقستانداعى ەرەجەلەر

قازاقستاندا جولاۋشىلار قۇقىعى «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى» زاڭىمەن قورعالادى. زاڭنىڭ 86-بابىندا كەشىگۋگە بايلانىستى ناقتى تالاپتار كورسەتىلگەن:

• 2 ساعاتتان ارتىق كۇتسەڭىز، 2 رەت تەگىن قوڭىراۋ شالۋعا نەمەسە 2 حابارلاما جىبەرۋگە قۇقىعىڭىز بار؛

• بالالارى بار انالارعا ارنايى بولمە بەرىلۋى كەرەك؛ 

• 4 ساعاتتان اسسا، تاماق بەرىلۋگە ءتيىس (كۇندىز ءار 6 ساعات سايىن، تۇندە ءار 8 ساعات سايىن)؛

• كۇندىز 8 ساعاتتان، تۇندە 6 ساعاتتان ارتىق كۇتكەندە قوناق ۇيمەن قامتاماسىز ەتۋ مىندەتتى؛

• رەيس 5 ساعاتتان اسا كەشىكسە، اقشانى تولىق قايتارۋدى نەمەسە باسقا رەيسكە تەگىن بيلەت الۋدى تاڭداي الاسىز.

بارلىق شىعىندى اۋە كومپانياسى ءوزى كوتەرەدى. ەگەر ولار مىندەتىن ورىنداماسا، ق ر تۇتىنۋشىلاردىڭ قۇقىقتارىن قورعاۋ كوميتەتىنە نەمەسە ازاماتتىق اۆياسيا كوميتەتىنە شاعىمدانۋعا بولادى.

ەۋروپاداعى ەرەجەلەر

ەو ەلدەرىندە جانە وعان قوسىمشا ءبىرقاتار اۋماقتا №261/2004 رەگلامەنتى مەن مونرەال كونۆەنسياسى قولدانىلادى.

• 1500 شاقىرىمعا دەيىنگى قاشىقتىقتا — 2 ساعاتتان كەشىكسە، تەگىن تاماق پەن سۋسىن بەرىلەدى؛

• 1500–3000 شاقىرىم — 3 ساعاتتان سوڭ قىزمەت كورسەتىلەدى؛

• 5 ساعاتتان ارتىق كەشىكسە، بيلەت قۇنىن قايتارىپ الۋعا نەمەسە باسقا رەيسكە اۋىسۋعا بولادى.

سونىمەن قاتار، 125-تەن 600 ەۋروعا دەيىن وتەماقى تالاپ ەتۋگە مۇمكىندىك بار.

اقش، ازيا جانە افريكا

بۇل ايماقتاردا ءبىرىڭعاي زاڭ جوق، ءبارى تاسىمالداۋشىنىڭ ەرەجەسىنە بايلانىستى.

• اقش-تا تەك ءبىر تالاپ بار: رەيس 2 ساعاتتان كەشىكسە جانە جولاۋشىلار ۇشاق ىشىندە وتىرسا، سۋ مەن تاماق بەرىلۋى كەرەك.

• ازيا مەن افريكادا دا زاڭدار ەلگە قاراي وزگەرەدى، كوپ جاعدايدا كومپانيانىڭ ءوز ساياساتى شەشۋشى ءرول اتقارادى. سوندىقتان بيلەت الاردا اۋە كومپانياسىنىڭ بەدەلىن، كەشىگۋ تاريحىن الدىن الا قاراپ شىققان ءجون.