اۋە بورتىنا قۇرت الىپ كىرۋگە بولا ما؟ جالپى اۋەكومپانيالاردا تاماققا قاتىستى قانداي ەرەجەلەر بار؟ تولىعىراق aqshamnews.kz ماتەريالىندا.
ەرەجەلەر قانداي؟
Vietjet Qazaqstan
اۋە كومپانياسىنىڭ باسپا ءسوز قىزمەتىنىڭ حابارلاۋىنشا، قاتتى قىشقىل ءسۇت ونىمدەرىن، سونىڭ ىشىندە قۇرتتى قول جۇگىندە الىپ جۇرۋگە رۇقسات ەتىلەدى.
"ولاردىڭ سالماعىنا قاتىستى ارنايى شەكتەۋ جوق، ەڭ باستىسى - قول جۇگىنىڭ جالپى سالماعى اۋە كومپانياسىنىڭ ەرەجەسىنە ساي بولۋى كەرەك"، - دەپ ناقتىلادى كومپانيا وكىلدەرى.
ال قىشقىل ءسۇتتى سۋسىندارعا قاتىستى تالاپ قاتاڭىراق. قىمىز، شۇبات، ايران جانە باسقا دا سۇيىق ونىمدەردى ۇشاق سالونىنا الىپ كىرۋگە بولمايدى.
"مۇنداي سۋسىنداردى جۇككە وتكىزۋگە رۇقسات بار، ءبىراق ولار سالقىنداتىلعان كۇيدە جانە وندىرىستىك قاپتامادا بولۋعا ءتيىس. قاپتامادا تاۋاردىڭ شتريح-كودى، ءوندىرۋشى تۋرالى اقپارات كورسەتىلۋى قاجەت. سونداي-اق، كولەمى ءبىر جولاۋشىعا 5 ليتردەن اسپاۋى كەرەك"، - دەپ ءتۇسىندىردى كومپانيا.
FlyArystan
بۇل اۋە كومپانياسىندا ءسۇت جانە قىشقىل ءسۇت ونىمدەرىن تاسىمالداۋعا بولادى، ءبىراق قاتاڭ شارتتارمەن.
- ونىمدەر تەك سالقىنداتىلعان كۇيدە قابىلدانادى؛
- تەك تىركەلگەن جۇك رەتىندە وتكىزىلەدى (قول جۇگىندە بولمايدى)؛
- مۇنداي جۇك Limited Release جاپسىرماسىمەن تاڭبالانادى (ياعني تاسىمالداۋشىنىڭ جاۋاپكەرشىلىگى شەكتەۋلى).
قاپتاماعا دا قوسىمشا تالاپتار بار:
- ىدىس بەرىك، گەرمەتيكالىق جابىلعان بولۋى كەرەك جانە كولەمىنىڭ 4/5 بولىگىنە دەيىن عانا تولتىرىلۋعا ءتيىس؛
- اعىپ كەتپەۋى ءۇشىن ءونىمدى ءۇش قاباتتى پوليەتيلەنگە وراپ،
- سىرتىنان قاتتى قوراپقا (مىسالى، كارتون قوراپ) سالۋ قاجەت.
SCAT
SCAT اۋە كومپانياسىندا ەرەجەلەر ودان دا قاتاڭ: قىشقىل ءسۇت ونىمدەرىن ءارى تىركەلگەن باگاجدا دا، ءارى قول جۇگىندە دە تاسىمالداۋعا تىيىم سالىنادى.
ەرەكشەلىك تەك:
- بالالار تاعامىنا،
- جانە دارىگەر تاعايىنداعان ارنايى ديەتالىق تاعامعا عانا جاسالادى.
Air Astana
Air Astana ەرەجەلەرىندە قۇرت پەن باسقا قىشقىل ءسۇت ونىمدەرىن تاسىمالداۋعا تىكەلەي تىيىم كورسەتىلمەگەن. دەگەنمەن جولاۋشىلار تاعام الىپ جۇرۋگە قاتىستى جالپى تالاپتاردى ەسكەرۋى كەرەك.
مىسالى، اعىپ كەتۋدىڭ جانە جاعىمسىز ءيىستىڭ الدىن الۋ ءۇشىن ءونىم تەك بەرىك ءارى ءبۇتىن قاپتامادا قابىلدانادى. قاپتاما كەمىندە ءۇش قاباتتان تۇرۋى كەرەك، ال ءبىرىنشى جانە سوڭعى قابات مىندەتتى تۇردە تىعىز پوليەتيلەننەن جاسالۋعا ءتيىس.
دايىن تاعامداردى تاسىمالداۋعا دا شارت بار: ولار سۇيىق قوسپاسىز بولۋى جانە گەرمەتيكالىق قاپتامامەن جابىلۋى قاجەت.
ساپارعا قۇرت نەمەسە باسقا قىشقىل ءسۇت ونىمدەرىن الماس بۇرىن، ناقتى اۋە كومپانياسىنىڭ تالاپتارىن الدىن الا قاراپ شىققان دۇرىس.