ءماجىلىس دەپۋتاتى داۋلەت مۇقايەۆ تۋريزم جانە سپورت ءمينيسترىنىڭ ورىنباسارىنا ساۋال جولداپ، كولسايدا سۋعا تۇسكەن پاۆەل دۋروۆقا نەگە ايىپپۇل سالىنباعانىن سۇرادى، - دەپ حابارلايدى Massaget.kz ءتىلشىسى.
"پاۆەل دۋروۆ كولسايعا كەلىپ، سۋعا ءتۇستى. ايىپپۇل سالىنادى دەدى، ءبىراق وندا بەلگى جوق دەدى، "ۇقيت-سۇقيت" دەپ ايىپپۇل سالىنبادى. ال وندا سۋعا تۇسكەن قانشا قازاقستاندىق ايىپپۇل ارقالادى؟" - دەدى ول.
تۋريزم جانە سپورت ءمينيسترىنىڭ ورىنباسارى سەرىك جاراسبايەۆ بۇل سۇراق ەكولوگيا مينيسترلىگىنىڭ قۇزىرەتىندە دەپ جاۋاپ بەردى.
دەپۋتات تۋريستىك نىساندارعا كىرۋ اقىسىنا دا توقتالدى.
"تۋريستىك نىساندارعا كىرۋ اقىسى ەكى ءتۇرلى بولۋى: ءوزىمىزدىڭ قازاقستاندىقتارعا نەمەسە شەتەل ازاماتتارىنا. مىنا تۇرعان وزبەكستاننىڭ ءوزى، تۇركيادا، مەن كورگەن ۆەتنامدا، تايلاندتا جاي ساياباققا كىرۋ ءوز ازاماتتارى ءۇشىن تەڭگەگە شاققاندا 250-300 تەڭگە بولادى دا، ال وزگە ەلدىڭ تۋريستەرىنە 10-15 ەسە باعادا بولادى. بىزدە وسىنى ۇسىنىپ ەدىم، "جوق، تۋريستەر كەلمەي قويادى" دەگەندەي ءبىر ءۋاج ايتتى. شىنى كەرەك، ونى تولىق تۇسىنە المادىم. قاشانعى سىرتتان كەلەتىن قوناقتاردىڭ ىعىنا قاراي جىعىلا بەرەمىز؟! مىسالى ورتا ەسەپپەن الماتىنىڭ بوتانيكالىق باعى نەمەسە قوجا احمەت ياسساۋي كەسەنەسىنە كىرۋ اقىسى - 1000 تەڭگە، شەتەلدىك تۋريسىنە ول - 2 دوللار. قىتايدان تۋريست كوپ كەلىپ جاتىر دەيمىز. يۋانعا شاققاندا، 10-14-اق يۋان. ولار ءۇشىن ساداقا اقشا عوي اينالىپ كەلگەن كەزدە"، - دەدى دەپۋتات.
تۋريزم جانە سپورت ءمينيسترىنىڭ ورىنباسارى سەرىك جاراسبايەۆ دەپۋتاتتىڭ ساۋالىنا جاۋاپ بەردى. شەنەۋنىكتىڭ ايتۋىنشا، ءقازىر نەگىزگى ماقسات - شەتەلدىك ءتۋريستى كوبەيتۋ. بىلتىردىڭ قورىتىندىسى بويىنشا قازاقستانعا شامامەن 15 ملن شەتەلدىك ازامات كەلگەن.
"باسقا باعا قوياتىن بولساق، قازاقتىڭ قوناقجايلىعىنا اسەرىن تيگىزەدى دەپ ايتۋعا دا بولادى. ءسىزدىڭ قويعان سۇراعىڭىزدى ەكىنشى وقىلىمعا دەيىن قاراستىرايىق"، - دەدى مينيسترلىك وكىلى.